Chawnpui aiin Mizoram Police an ṭha zawk

LZ Juice MPL11-ah Mizoram Police-in Chawnpui FC 3-0 in an hneh a, MPL champion lai hi SYS hneh loh vanga an mualpho hnuah an rawn tho chhuak lehnghal. Nimin tlai inkhel hmuhnawm takah Police tan Lalbiakhlua, F. Lallawmkima leh Isaak Malsawmkima ten an khung.

Fakzuala telna

Mizoram Police tan chanchin lawmawm a awm a, captain Lalfakzuala chhawr theihin a awm tawh. Goalkeeper F. Lalmuanawma a ha zaitir avangin a chawl a, R. Malsawmkima'n (Mana) khelh theihna hun ṭha a neih phah.

Defence laiah Lalhmunmawia (Ahmuntea) kawppui turin B. Sena a awm tawh a, right back-ah Lalrinzuala Khiangte a awm thei tawh bawk. Malsawmfela hahdamna hun an pe a, Zaithanmawia'n bul a ṭan thung.

Chawnpui lamin Vanlalthanga leh Lalthanzuala te bench-ah an dah a, goal nawr turin K. Lalrosanga, Lalruatpuia leh captain Laltlansanga te an awm. Coach B. Malsawmzuala enkawl team hian chak hmel an la hmu lo a, Police lakah fimkhur takin player an rem.

Biaktea goal

Chawnpui leh Police ten nung takin inkhel bul an ṭan a, an inhnehtawk hle. Goal la luh hmain Chawnpui winger K. Lalrosanga'n ṭha takin a la lut a, goal-ah ṭha takin pet zui mah se keeper Mana'n ṭha zetin a dang.

Police erawh goal hmaah an vannei a, goalkeeper RVL Nunmawia'n a ball man tawh chu thlauhin Biaktea'n minute 23-naah a pal lut. Goal luh hnuah pawh an la inhnehtawk zel a, Police tan Fakzuala a hmuhnawm hle.

Chutihrualin goal mamawh Chawnpui lamin Police tlarhnung an rum ṭhaih ve reng a, Lallawmawma leh Lalruatpuia te an hmuhnawm. Sabual tlangval Ruatpuia'n hnai tak aṭangin ball a kheng a, crossbar a per. Chawnpuiin first half-ah goal an khung thei lo.

Goal hnih dang

Chawnpuiin si phurh sut tumin second half ṭan chiahah Thanga leh TZ-a te an luhtir a, an goal bawh a na sawt. Amaherawhchu Ahmuntea, B.Sena, Rinzuala leh Lalrodawngkima te an che ṭha a, chance ṭha bik erawh an insiam thei lo.

Bench aṭanga lut Thanga'n box pawn aṭangin chance a nei a, a pet over. TZ-a pawhin a lu hmanga khung theihna remchang a nei a, goal zawnah a tauh thei lo. Chawnpui defender chetsual vangin Lawma'n hun ṭha a nei a, minute 63-naah Khawbung tlangval hian chiang zetin a pet goal.

Chawnpuiin defender Tluangliana over lap hmangin chance nei ve ṭhin mah se a hmawr an bawk fuh ṭhin lo. Police-in bench aṭangin Malsawmfela an luhtir a, counter attack-a an chance neih a hlauhawm sawt.

Mahse, Sawmfela vanneih ni a ni lo a, keeper Buanga chauh a hmachhawn hnuah a khung lo. BS-a Colney hoten inkhel an thunun zel a, minute 88-naah substitute Isaak Malsawmkima'n box pawn aṭangin cool zetin a pet lut.

MPL champion lai Police chu an phu angin, 3-0 in an chak a, point ruk hmuin semifinal khel thei chinah an inhlangkai. Chawnpui erawh match li khelh aṭangin chak an la nei lo a, pasarihnaah an lungawi a ṭul thung.