Bethlehemin SYS an chelh

LZ Juice MPL11-ah Bethlehem FC-in nimin khan season bul ṭan ṭha SYS FC an chelh a, Lalhriatpuia Sailo hoten point khat hlu tak an hlawh chhuak. RG Stadium-a inkhelah hian SYS FC tan Andreas Lalhmingmuana'n (V. Muana) hmahruaina goal a khung a, Bethlehem tan Varun Raj Tamang-a'n sutin, 1-1 in an inhnehtawk.

SYS hian point thum an hlawhchhuah theih loh avangin hmahruai theihna hun ṭha an bawhpelh a, semifinal khelh phak an tum a nih chuan insiamṭhat ran an mamawh ang. Bethlehemin hma an sawn hret a, chutihrualin table mawngphah chhuahsan tur chuan hmasawn zel an mamawh.

Goal khat ve ve

Bethlehemin First Division an khelh laia midfielder pathum Kiran Chhetri, Varun Raj Tamang leh Joseph Lalṭhafela te an luhtir a, ṭum dang aiin an khel ṭha a, SYS FC aiin bul an ṭan ṭha zawk.

FCB midfielder Kiran-a'n goal khung theihna remchang nei mah se goal-ah a pet na tawk lo. SYS an insiamrem a, Bethlehem tlarhnungin hna an ngah hret. Captain Malsawmdawngkima a chesual a, SYS player a pet per avangin V. Muana'n box chhungah ball ṭha chang fuhin rilru fim takin minute 42-naah hmahruaina goal a khung.

SYS-in corner kick hmangin Bethlehem an ṭhawng a, captain Lalruatsanga'n goal khung theihna tur ṭum hnih a neih chu a hmang ṭangkai lo ve ve. Second half-ah team pahnih an inhnehtawk chhunzawm a, Bethlehemin freekick hmang ṭangkaiin si phurh an sut.

Minute 72-naah Lalrammuanpuia'n box pawn aṭangin freekick a pet a, keeper Joseph Laltluangpuia'n nam pera lo man tum mah se a man nghet zo lo. Hemi per hi Varun-a'n chiang zetin a pet goal.

Hun tawp lamah team pahnihin chak tumin an innawr ve ve a, goal chance pawh a tam. SYS chungnung zawk mah se Bethlehemin chance ṭha an ngah zawk. FCB substitute Malsawmzela'n (Valpuia) a hun ṭha neih chu goal zawnah pet thei mah se keeper Joseph-a'n a tihsual siam ṭhat nan ṭha zetin a dang a, 1-1 in inkhel a tawp.

Eng nge an sawi?

FC Bethlehem coach Lalhriatpuia Sailo chuan, "Kan khelh danah hma kan sawn a, kan lawm. Hun tawp lama kan chance neih kha khung ila, chak thei kan ni. Mahse, inkhel pumpui thlirin draw kha result awm tak a ni," tiin Vanglaini a hrilh.

SYS FC coach Lalmuankima chuan, "Inzir nan kan hman a ngai," tiin point thum hlawhchhuah theihna tura point khat chauh an hmuh avanga insiamṭhat an mamawh thu a sawi.

I Day Football khelh hmain round khat chauh khelh tur a awm tawh. SYS-in Ramhlun Athletic an hmachhawn ang a, Bethlehemin Chawnpui an hmachhawn thung ang.