Badminton-ah kum dik lo ngai pawimawh

India rama badminton thuneitu sang ber Badminton Association of India (BAI) Annual General Meeting chu July 21, Pathianni khan neih a ni a, thurel langsar zingah age category bik badminton inelnaa kum dik loa inlan an la tam lutuk tihrem dan a tel a, BAI-in a rang lama hma la vat tura tih a ni.

Taj Vivanta, Guwahati-a neih AGM hma hian BAI Executive Committee meeting pawh neih a ni a, he hun hmang tur hian Mizoram aṭangin MBA hruaitu pathum, BAI executive Member & MBA senior vice president H. Lalnunsiama, MBA vice president Lalchhuanawma leh MBA joint secretary C. Zoremsanga te an tel.

BAI president leh Assam chief minister ni bawk Himanta Biswa Sarma chuan AGM hi kaihruaiin, BAI hmasawnna hrang hrangte a tarlang a, season hman zawh takah khan BAI hnuaia shuttler-te chuan senior leh junior-ah medal 233 ngawt an lak thu a tarlang.

AGM-ah hian state association tinte hnenah cheng nuai 7.5 pek tura rel niin, an hmalaknate report-a an thehluh leh erawh a ngai dawn thung a ni.