Al Ittihad-in Ederson an duh!

Saudi Pro League club-ten nipui transfer-ah thawm an chhuah leh ṭan a, khawthlang media ṭhenkhat chuan Al Ittihad-in Manchester City goalkeeper Ederson lakluh an tum niin an tarlang leh tawh - Saudi club hian City an be pawp tawh.

Cristiano Ronaldo khelhna Al Nassr chuan Ederson lakluh tumin City hi an lo dawr tawh a, mahse, an dawrna hi pound maktaduai 25 'lek' a nih avangin City hian an hnar - Pep Guardioala enkawl team hian £50mtd an chhiar niin an sawi.

Hetiang boruak karah Al Ittihad an lo lang a, City chhiarna zat hian an ngam dawn niin a lang. Hetihrual hian City hian an keeper hi chelh an duh ber nia sawi a ni a, a hlawh tihsan pawh an hnial lo. Mahse, Ederson hian Saudi pan a hreh lo a, tun kar chhunga inbiakna hi a fel hman beisei a ni.

Kar khata £180,000 vel hlawh nia sawi keeper hi Al Nassr khan kar khata £900,000 hlawhtir an inhuam niin khawthlang media-te chuan an tarlang a, Al Ittihad hian chan an duh a nih chuan hei aia hniam hi an zawrh lo tawp ang.