Bagan-in A League goal khung hnem ber la lut

Mohun Bagan chuan Australian top flight league-a goal khung hnem ber record chelh mektu Jamie Maclaren an la lut a, kum 30 mi striker hian Kolkata club-ah kum li chhung khel turin contract a ziak.

Maclaren chuan, "Club hlawhtling tak ka zawm a, kan hlawhtlinna kan chhunzawm a, India ram club ṭha ber kan nih reng theih nan he hmun hi ka rawn pan a ni," a ti a, hlawhtling tura Kolkata club pan a nih thu a sawi.

Kum 30 mi striker hian season hman zawh takah khan A League club Melbourne City tan inelna hrang hrangah match 34 khelin goal 11 a khung a, assist vawi hnih a nei bawk.

Maclaren hian A League-ah hattrick vawi riat siam tawhin, he inelnaa siam hnem ber a ni a, goal 151 khungin A League-a goal khung hnem ber a ni bawk. A League-ah hian Perth Glory aṭanga bul ṭanin, Brisbane Roar leh Melbourne tan a khel tawh bawk.

Melbourne-ah hian legend a ni a, inelna hrang hrangah match 162 khelhsakin goal 113 a khung a, assist vawi 17 a nei bawk. German second division lamah Darmstadt 98 tan khel tawhin, Scottish Premiership club Hibernian-ah a khel tawh bawk a ni.

Australia tan match 31 khela goal 11 khungin, World Cup-ah hial a inlan tawh a, A-League Golden Boot hi vawi li dawng tawhin, A League Team of the Season-ah vawi nga a lang a, A-League Young Footballer of the Year-ah vawi hnih thlan a ni.

Melbourne tan A League nomawi vawi thum a chawi tawh a, season khatah nuai 450 bawr vel a hlawh dawn niin an sawi - Mizo midfielder Lalengmawia Ralte (Apuia) nen Bagan hian 'salary cap' pawnah hlawh an pe ang.

ISL club-te hian season khatah player hlawh atan vaibelchhe 18 aia tam an seng thiang lo a, an duh a nih chuan hemi tiam chin pawn lamah hian player pahnih an ziak lut thei - Maclaren leh Apuia hi vaibelchhe 18 hian a huam ve lo tihna a ni.

Mohun Bagan hi nipui transfer-ah an bazar hraw hle. Maclaren hma hian Apuia chu Mumbai City aṭangin an thlem chhuak a, A League club Brisbane Roar centre back Tom Aldred, Spanish defender Alberto Rodríguez, Mumbai City attacking midfielder hlui leh Scottish Premiership club Kilmarnock tana khel mek Greg Stewart te an lo la lut tawh bawk.

Kolkata club hian Villarreal coach hlui José Francisco Molina kaihhruaina hnuaiah inelna an hmachhawn dawn a, club neitu Sanjiv Goenka hausakna zar an zo zel - RPSG Group Chairman hi a mimal hausakna ringawt pawh dollar tluklehdingawn 3.4 vel nia sawi a ni.