Barca-in Nico an hnaih

Hansi Flick enkawlna hnuaia indinthar tum Barcelona chuan Nico Williams an hnaih zel a, tun kar hian indawrna an kalpui chhunzawm ang - kar hmasa khan Barca sporting director Deco chuan Nico-a agent a hmu tawh a, indawrna a fel thuai an beisei.

Barcelona hian tun hnaiah sum lamah harsatna an tawk a, hei vang hian Atheltic Bilbao forward Nico-a team te hi an hlauthawng nia sawi a ni. Mahse, Barca hian sum chungchangah harsatna a awm loh thu an hrilh a, Euro 2024-a Spain champion puitu hi an la lut hnai.

Kum 22 mi Nico hian season hman zawh takah khan Athletic tan inelna hrang hrangah match 37 khelin goal riat a khung a, assist vawi 19 a nei. Spanish media-te chuan Nou Camp-ah kum nga chhung atan contract a ziak dawn niin an sawi.

Catalan club hian Nico transfer an tihfel zawhah player dang an melh zui dawn a, Dani Olmo lam an hawi dawn nia sawi a ni. RB Leipzig midfielder hi Euro khelh zawh taka Spain champion theih nana player langsar a ni a, Barca academy aṭanga inzir chhuak a nih avangin Barca zawm a hreh lo ang.