Chân loh khanah Oscar Piastri a chak ber
Oscar Piastri chuan khawvel barakhaihin Hungarian Grand Prix-ah hnehna a chang a, car intlansiakna sang leh ngaihhlut berah hian a vawi khat nen hnehna a chang a ni.
Pathianni zana intlansiakah McLaren team an che ṭha hle, an driver Piastri a thlen hmasak ber bakah hian a team-mate Lando Norris chu pahnihna a ni a, tun hnaiah Norris hi Max Verstappen chhaih buai ve phak ber a ni mek.
McLaren an chak
Hungaroring tlankawnga intlansiakah, qualifying aṭangin McLaren an che ṭha hle - Lando Norris chuan a hmasa ber aṭangin inelna a hmachhawn a, a hnung chiah aṭangin Oscar Piastri hi a tlan chhuak ṭan ve thung.
Intlansiak chu McLaren in an thunun tia sawi theih a ni a, an elpui Mercedes driver Lewis Hamilton an dan theih nan erawh Norris leh a ṭhianpa an ṭandun a ngai thung a, team lam pawhin thutlukna harsa tak an siam a ngaih phah.
McLaren lamin pit stop lam an koh luh hmasak Piastri chu a hmasa zawka a tlan leh theih nan a teammate chu kawng kian turin an ti a, mahse tunlaia che ṭha ve tak Norris chuan a kian phal mai lo, a tawp dawnah erawh kawng a hawnsak.
Kum 2021 Italian Grand Prix-ah khan McLaren chuan intlansiak pakhatah a hmasa ber leh a dawt dinhmun an lo luah tawh a, chumi hnuah tun ṭum hi pakhatna leh pahnihna dinhmun an hauh kawp leh theihna hmasa ber a ni hial.
McLaren chuan an thutlukna siam chu team tana ṭha ber tur a nih thu an sawi a, intlansiak a zawh hnuah Piastri leh Norris te pawh helmet la thlain an inchibai zui a, an boruak a chhe zui lem lo a ni.
A awlsam lo
A hmasa bera a tlan laiin a teammate chu kawng kian tura tih a ni a, chak thei dinhmuna din hnua pahnihna ni tura thutlukna siam chu Lando Norris tan thil awlsam a ni lo ang, mahse team thupek zawmin Oscar Piastri tan kawng a hawnsak.
Britain tlangval Norris chuan, "Dinhmun ṭhaa min siam hmasatu chu kan team an ni a, beiseina sang tak min siamsaka hma ka hruai theihna chhan pawh an ni. Chumi hnua kan tana ṭha tura thutlukna siamtu pawh team lam bawk an ni.
"A nihna takah chuan pakhatna ni thei dinhmuna din hnua inhnuhhniam leh chu a awlsam lo. Mahse, tun hmain Oscar hian ka tan hna ṭha tak tak a lo thawk tawh ṭhin, intlansiak tam taka min puih tawhna chu ka rulh let ve hun a thleng," a ti.
Hnehna changtu Oscar Piastri chuan, "Team leh Lando chungah khan rinna ka nghat a, intlansiak neih hma inhmuhkhawmnaah pawh team tana ṭha ber tur kha ngun takin kan sawi ho a, a tawpah a ṭha ber tura kan ruahman angin a thleng.
"Ka tan chuan Formula 1 huanga hnehna chan hi duhthusam a ni a, ka naupan lai aṭanga ka suangtuah ve ṭhin chu a takin a lo thleng," a ti. Driver championship lamah pawh point 149 hmuin pangana dinhmun a luah chho ve mek a ni.
Hmasawn a ngai
Formula 1 season thum chhung chu hnehsawh takin Red Bull an champion a, kuminah pawh an chungnung viau. Chutihrualin tun hnaiah McLaren chuan an rawn el phak lek lek ta mai a, champion lai Max Verstappen chuan hmasawn an ngai tih a sawi.
Dutch tlangval hi Hungarian Grand Prix-ah pangana a ni a, a hmaah hian Piastri leh Norris te bakah Mercedes driver Lewis Hamilton leh Ferrari car khalhtu Charles Leclerc te an thleng, ngaihṭha taka awm ngawt thei a ni tawh bik lo.
A zawna vawi thum champion tawh Verstappen chuan, "Kan thil tih leh chet danah ngaihdam dil a ngaihna lai ka hre lo a, chutihrualin tun aia ṭha zawkin kan tih a ngai tih erawh thil chiang a ni.
"Mimal chauh a ni lo a, team pumpuiin hma kan sawn a ngai. Ka sawi tawh ṭhin angin mimala chet ṭhat a tawk lo, a fuh lo lai pakhat lek a awm pawhin chak theih a ni lo," a ti. Tun hnaiah beisei phak lo hret mah se, amah hnaih bertu Norris aiin point 76 ngawtin a la sang zawk.
Car intlansiakna sang ber hi July 28, Pathianni zan hian Spa-Francorchamps tlankawngah Belgian Grand Prix an tlan leh dawn - tun hnaiah inelna boruak a nun thar em avangin F1 ngainatute tan chuan a nghahhlelhawm leh khawp ang.