Rangnick kha a lo dik a ni - Ten Hag

Manchester United manager Erik ten Hag chuan tun hma lama club lo enkawl lailawk tawhtu Ralf Rangnick-a'n club chhung harsatna leh tuam dam ngai lai a sawi chu a dik tih a pawmpui.

Kum 2022 khan Ten Hag hian Manchester United hi a enkawl ṭan, ani hma hian thla sarih chhung chu Old Trafford-ah Rangnick hian hna a lo thawk a, a hna tawh chu Ten Hag-a'n a chhunzawm thung.

Rangnick khan Manchester United chu chhungril aṭanga an inṭhuahfai a ngai niin a sawi a, pawn lama player ṭhenkhat thlak kual vel ngawt chu an damna tur a nih loh thu leh, a lairil an siamṭhat a ngai tih a lo sawi tawh.

Tun hnai maia contract pawtseitu Ten Hag chuan, "Tun hnai kum hnih chhung chu rim tak maiin hna ka thawk a, chuta ṭanga ka hmuh chhuah pakhat chu Rangnick khan a lo sawi dik hle a ni tih hi a ni.

"Hna ka zawm tirh khan a hautak dawn tih ka hria, hna kan han thawk ṭan chiah mai chu pawn lam aṭanga en ai khan a lo hautak hle bawk a lo nia, tunah chuan zawimuangin hmalam kan pan," a ti.

Nikum December thla khan Sir Jim Ratcliffe chuan Manchester United-ah hian neitu nihna 27.7% a nei a, ani a rawn lan hnuah hian player lei leh hralh chungchangah pawh danglamna a thleng chho mek niin a lang.

Club kaihhruai kawngah Omar Berrada, Dan Ashworth, Jason Wilcox leh Christopher Vivell te an rawng lang a, training gound tihhmasawn nan pawh pound maktaduai 50 ngawt hman tura tih a ni.

Tun nipui bazar chhungin forward Joshua Zirkzee leh defender Leny Yoro te chu Bologna leh Lille aṭangin a lei fel tawh a, manager Ten Hag chuan Bayern Munich aṭangin Netherlands centre-back Matthijs de Ligt lak a la duh bawk.

Dutch manager Ten Hag chuan, "De Ligt hi ka hriatna a rei tawh a, kum hnih liam ta pawh khan kan hnena khel tura lak ka duh tawh, mahse Bayern Munich tan a khel ta zawk, tunah pawh kan hnena khel turin ka la duh," a ti.

Season hmasa khan Ten Hag hian Jadon Sancho nen buaina an nei a, kum 2023 August thla hnuah Man United tan a chhawt zui tawh lo, season hmasa chawhnu lam phei chu a club hlui Borussi Dortmund lamah loan hmangin a chhuahtir hial.

Tun hnaiah erawh Sancho leh Ten Hag inkar a ṭha leh tawh a, training pangngai a zawm bakah season thar inbuatsaihna match an khelh ṭum pawhin English forward hi a inlan - Premier League season thar chu rilru thar nen kan hmu dawn niin a lang.

Man United manager Ten Hag chuan, "Tu pawhin thihsual kan nei thei, chumi aṭanga insiamṭhat chu a pawimawh lai chu a ni. Tlarhma lamah player duh thlan tur kan ngah phah sawt ang," tiin a sawi.