AIFF-in Secretary General thar a nei

India rama football thuneitu sang ber All India Football Federation chuan secretary general thar atan Anilkumar Prabhakaran a ruat a, AIFF president Kalyan Chaubey-a rawtna chu July 20, Inrinnia AIFF hruaitu ṭhukhawm chuan an pawm a ni.

AIFF president Chaubey hian September, 2022 lawka Secretary General atana lakluh Dr. Shaji Prabhakaran chu inhmuhthiam lohna avangin November 8, 2023 khan a hna aṭangin a ban a, a aiawhtu hi ruat lawk a ni lo.

Hetih chhung zawng hian M Satyanarayan chuan AIFF Secretary hna hi a thawk lailawk a, tunah chuan Anilkumar-a'n he hna hi a nghetin a thawk zui dawn - Anilkumar hi Kerala lam mi niin, a thlak tak Shaji pawh kha Kerala lam chhuak tho a ni.

Anilkumar hi Kerala Football Association Secretary ni lai niin, Kerala Olympic Association-ah Joint Secretary a ni bawk a, AIFF Secretary General Office a luah hmain state lama a nihnaah te a bang phawt ang - thla khat vel chu office-a la luah rih dawn lo.

AIFF danah Anilkumar hian AIFF Executive Committee member a nihna aṭanga banna a thehluh a ngai bawk a, hei hi AIFF Executive Committee hian an pawm nghal bawk a ni.