Zverev ngamtu Arthur Fils

Hamburg Open champion lai Alexander Zverev chuan a nomawi kawl lai a humhim thei ta lo. Pathianni zan khan final khelh niin, inkhel hmuhnawm takah Arthur Fils chuan Zverev hi 6-3, 3-6, 7-6(1) in a hneh.

Fils hi seeded pangana pek a ni a, a hneh tak Zverev hi champion lai a nih bakah player inlan zinga ranking sang a nih avangin seeded pakhatna pek a ni thung. Darkar thum leh minute 33 an inkhelh hnuah player langsar lo zawk a chungnung.

Player pahnihte hi vawi thum an intawnna niin, tun hma vawi hnih an inkhelh tawhah Zverev a chak ve ve, season hmasa Hamburg Open semifinal-ah ngei pawh German tlangval hi a chungnung, kuminah erawh thawnthu a danglam ta a ni.

Kum 20 mi Arthur Fils chuan, "Ka khelh danah khan ka lawm takzet a ni, a chhan chu ka service dawn khan harsatna ka nei deuh ṭhin a, chutiang chunga match ṭha tak ka khel chhuak thei kha ka tan a hlu.

"A nihna takah chuan a hmuna inkhel entute khan Zverev kha an ṭan em em a, an ram mi a nih bakah champion lai a ni bawk a, thil nih dan tur pawh a ni. Khatiang inkhel boruak sang taka chak erawh a hlu zual bik," tiin a sawi.