Swiss Open champion Berrettini

Pathianni zana khelh zawh tak Swiss Open-ah Matteo Berrettini a champion. Italian tlangval hian tennis season kal laia a nomawi pahnihna chawi tur hian Quentin Halys a hneh.

Seeded parukna Berrettini hian a khingpui lakah harsatna lian tham a tawk lo, minute 59 chung lekin 6-3, 6-1 in a hneh a, tennis a khelh hun chhungin nomawi pakua a chawi tling ta chiah bawk a ni.

Kum 28 mi Berrettini chuan, "Season ruk liam ta khan he hmunah hian nomawi ka lo chawi tawh a, mahse ka ngaihdan chuan thil thlengte kha hmanni lawk ang mai chauh a la ni, ka tan chuan he hmun hi a hlu hle," a ti.

Kumin March thla mai kha chuan Berrettini hi world number 150 pawh a ni phak lo, tun hnaiah hma rawn sawn lehin tunah phei chuan nomawi a chawi leh ta, ranking chhuak tharah chuan a sang zual 50 zingah a tel phak ve leh tawh ang.