Football hmasawn nana tha thawhtute chungah AIFF lawm

July 19, Zirtawpni Zan khan All India Football Federation chuan New Delhi-ah AIFF Awards a sem a, mimal chawimawina ngaihhlut hlawh tak tak sem zanah hian Indian football thuneitu sang chuan season liam taa AIFF inelna thlengtu leh sum leh paia puitu sumdawngte chungah lawmthu sawina award a hlan bawk.

AIFF hian Arunachal Pradesh sorkar leh Arunachal Pradesh Football Association chu Santosh Trophy final round an thlen avangin award a hlan a, FIFA World Cup Qualifiers, Intercontinental Cup, Kalinga Super Cup, Senior Women's NFC Group Stage, Junior Boys' & Girls' NFC Tier 1 leh Sub-Junior Youth League thlengtu Odisha sorkar leh Football Association of Odisha pawh award hlan an ni.

Anni bakah hian Jammu and Kashmir Sports Council chu India U17 men's national team camp vawi hnih ngawt an thlen avang leh TRC Ground hmun hma an thuam ṭhat avangin lawmthu sawina hlan an ni a, India rama football ṭhan theihna tura tha thawhtu Football Sports Development Limited, Nivia, Ministry of Youth Affairs and Sports, IndiGo, Sports Authority of India leh Performax te pawh lawmthu sawina hlan an ni.

Awards semchhuah zanah hian award ngaihhlut hlawh ber dawngtu chu Lallianzuala Chhangte a ni. Mumbai City forward hi AIFF Men's Player of the Year atan thlan a ni a, East Bengal striker thar David Lalhlansanga chu Promising Men's Player atan thlan a ni bawk.