A chung bera mi Pliskova a tla

US Open 2020 khelh laiah beisei loh result langsar kan hmu, nimin zing khan seeded pakhatna Karolina Pliskova chu Caroline Garcia hneh loin second round-ah a zin kawng a tawp.

World number 3 Pliskova bakah hian seeded chang phak zinga mi Elena Rybakina (11), Marketa Vondrousova (12) leh Alison Riske (13) te chu second round-ah an tla ve bawk. Naomi Osaka, Angelique Kerber, Petra Kvitova, Petra Martic leh Anett Kontaveit te erawhin hnehna an chang thung.

American star Serena Williams chuan vawiin chawhma lam hian Margarita Gasparyan a hmachhawn dawn. Grand Slam nomawi vawi 24-na chawi tumtu Serena tan Osaka, Kerber leh Kvitova te hi hmachhawn hautak tur zinga mi an ni dawn.

Kumin US Open-ah hian Covid-19 vangin player langsar inlan lo an tam, hmeichhe ranking sang zual 10 zinga paruk ngawt an inhnukdawk. Tualchhung nula Serena tan nomawi chawi theihna kawng a inhawng zau viaua ngaih a ni.

Coronavirus vangin world number 1 Ashleigh Barty leh number 2 Simona Halep te an inlan lo a, number 3 Pliskova chu seeded pakhatna pek a ni - Czech Republic nula hian a vawi khat nan Grand Slam title lak beiseina a nei sang hle.

US Open 2016 finalist hi world number 50 Garcia lakah chak tura rinkai zawk ni mah se darkar khat leh minute 33 chhungin 6-1, 7-6 (7-2) in a chak lo. Hnehna changtu Garcia hian third round-ah chuan American world number 41 Jennifer Brady a hmachhawn leh ang.

Kum 28 mi Pliskova chuan, "Khawl ni loin mihring ve tho ka ni a, tennis-ah chuan khelh fuh leh fuh loh deuh ni hi chu a thleng thei. Match zawng zawngah hian ṭha taka khelh theih a ni bik lo, ka khelh chhiat rualin ka khingpui khan a khel ṭha hle thung," a ti.

France nula Garcia hian tun hnaiah beisei a phak lo a, a ranking pawh 50-na daih a ni. Mahse tun hmain world number 4 pawh a lo ni tawh, hmeichhe tennis inelna huangah hian nomawi 10 a chawi tlin tawh avangin player dang tan pawha zuam sual theih tur tak a ni.

Grand Slam vawi hnih champion tawh Kvitova chuan hnehna chang turin vanneihna a mamawh tel. Kvitova hian a khingpui Ukrainian player Kateryna Kozlova-i'n set hmasa a khel fuh a, set point a hmuh hman hial tawh chu pawtthla lehin 7-6 (7-3), 6-2 in hnehna a chang let.

US Open champion hlui Angelique Kerber erawhin amah ang bawka German player dang Anna-Lena Friedsam lakah harsatna a tawk lo, world number 1 hlui hian 6-3, 7-6 (8-6) in hnehna a chang. Kerber leh Kvitova te hi champion tura rinkai zinga mi an ni.

Inkhel angah Osaka chuan darkar khat leh minute kua chhung lekin Camila Giorgi chu 6-1, 6-2 in a hneh. Japanese nula hian a match lehpekah chuan world number 137 Marta Kostyuk a hmachhawn leh ang, harsa lutuk loin a tlang mai a rinawm.

Kum 22 mi Osaka hian 2018 US Open final-ah khan rinkai lo zawk ni chungin Serena a lo hneh tawh a, 2019 Australian Open-ah a champion zui bawk. Kuminah pawh hian rinkai zinga mi a ni leh a, a khelh fuh ni chuan player ṭha dang hneh thei turin theihna a nei sang.