Harden awmna Rockets an tlang

James Harden-a'n nidang angin point a nei tam lo, mahse hun pawimawh vawrtawpah Luguentz Dort-a point neih tur a block sak avangin a team Houston Rockets chu Oklahoma City Thunder lakah a chakpui.

Nimin zing NBA playoff game 7 inkhelah Rockets hian 104-102 in hnehna an chang a, best of seven series chu 4-3 in an la. Harden awmna Rockets hian Western Conference semifinal an lut - Inrinni zingah Los Angeles Lakers nen game 1 an khel ang.

Rockets leh thunder an inkhel tawk takzet a, game thum ve ve la thei an nih avangin an inhlau lo tawn viau, chutihrualin a chak lo zawk chu tla mai tur an nih avangin an fimkhur hle. Second 4.8 chauh a awm tawh tihin Thunder guard Dort-a'n 3-point neih ngei tum mahse Harden a paltlang zo lo.

3-points hi lut ni se la chuan Thunder lam hian point khatin hnehna an chang thei chiah ang. Minute 35 chhunga point 30 nei thei Dort tan a hun ṭha hnuhnung dansak a ni chu a uiawm dawn tih a chiang a, inkhel tir lama point a neih hnem chu a lo thlawnah a luangral.

Nimin zing khan Milwaukee Bucks leh Miami Heat ten conference semifinal game 2 an khel ve bawk a, Bucks lam hi 114-116 in an chak lo! Rinkai lo zawk Miami lamin series-ah 2-0 in hma an hruai.

Inrinni zingah game 3 an khel leh dawn, Most Valuable Player Giannis Antetokounmpo awmna hian regular season hmang ṭha viau mah se tun hnaiah beisei an phak lo - tlang tur chuan hna hautak an paltlang a ngai tawh dawn.