United jersey number 34 Van de Beek

Manchester United chuan Nilaini zan khan Ajax aṭangin Donny van de Beek an lakluh thu an puang. English club hian Netherlands midfielder manah pound maktaduai 35 an seng a, a chet ṭhat dan a zirin pound maktaduai nga an pek belh ang. 

Kum 23 mi Van de Beek hian Ajax first team tan match 175 khelin goal 45 a khung a, Manchester United-ah jersey number 34 a ha dawn. 

Manchester United-in tun nipui atana an target number 1 Jadon Sancho an lak theih loh avangin sawisel an hlawh. Donny van de Beek lalut tur erawhin buaina an nei lo - man man taka an lak bawk avangin fak an hlawh ta thung.

Van de Beek hi zanina Netherlands-in Poland leh Thawhṭanni zana Italy an mikhual hmaa an lak ngei hi a pawimawh a, hemi hnua tihchian chu ni se England pawna inkhel tur an nih avangin quarantine a ngai dawn.

Tunah erawh United player nichunga inkhel tur a nih dawn avangin infiammi ram tana inkhel tur dangte angin ngaihhnathiam a ni ang. Ole Gunnar Solskjaer-a'n September 19-a Crystal Palace an hmachhawn hunah a chhawr thei nghal dawn tihna a ni.

United midfielder Van de Beek chuan, "Club sulhnu nei ṭha tak zawmna hun ka nei hi vannei ka inti a, ka lawm dan hi thuin ka sawi thiam lo. Chona thar hmachhawn turin ka inpeih a, Manchester United aia sang a awm tawh lo," tiin khawvel club ṭha ber zinga mi a zawm thu a sawi.

Champions League semifinal-a Ajax hruai thleng tawhtu Van de Beek chuan, "United hian khawvela midfielder ṭha ber ber an kawl a, an bul aṭangin thil tam tak ka zir theih ka beisei a, midfield tichaktu ka ni thei bawk ang. Manager nen kan inbia a, club tana a hmachhawp ka hriatin ka phur hle," tiin a sawi.

Ole Gunnar Solskjaer chuan, "Donny hian Manchester United-in kan mamawh ang hrang hrang theihna a kawl. Hmun awl a hmu thiam a, chet hun a hria a, game a chhut thiam bawk," tiin a player thar a fak.

United midfield-ah Paul Pogba, Bruno Fernandes, Nemanja Matic, Fred, Scott McTominay, Andreas Pereira leh Jesse Lingard te an awm sa a, chutihrualin Solskjaer-a'n a player neihte hi a ring tawk lo.

Covid-19 vanga inkhel a tam chungin Norweigian manager hian a player chhawr ngai a hmang nasa. Europa League semifinal-a Sevilla an hneh loh ṭumah pawh minute 87-naah chauh player a thlak.

Van de Beek hi Fernandes leh Paul Pogba te nen midfield-ah an awmho thei a, chutihrualin United-in Sancho an lalut lo a nih chuan tuna an formation hman thiam 4-2-3-1 thlakin 4-3-3 an hmang thei bawk. Formation thar an hmang a nih chuan Fred emaw Matic ten defence puiin Van de Beek leh Pogba ten an thlawp ang a, Fernandes-a'n tlarhma a thlawp thung ang. 

Ruud van Nistelrooy, Robin van Persie, Edwin van der Sar leh Jaap Stam te hming chher tawhna hmunah Van de Beek hian hming a chher chho thei a, chutihrualin squad tih chhahtu chauh a ni thei bawk.