Aizawl FC leh Chanmari FC an intluktawk

LZ Juice MPL11-ah champion rinkai pahnih Aizawl FC leh Chanmari FC te an inkhel a, goal awm loin an inhnehtawk. Nimin RG Stadium-a inkhelah goal lut lo mah se inkhel hmuhnawm bik a ni a, MPL hlutna belhchhah thei inkhel a ni.

Chanmari hian match li aṭangin point 10 hmuin league hmahruaitu an ni a, Aizawl FC-in point riat hmuin pahnihnaah an awm. MPL11-ah Chanmari, Aizawl FC leh SYS FC ten hneh loh an la tawng lo.

An inrem uluk

Chanmari FC-in tlarhnung an siksawi hret a, left back tawnhriat nei ṭha Sena Ralte a vawi khat nan a inlan. Defence laiah Lalrinchhana Tochhawng leh Lalhmangaihsanga te inkawpin right back-ah Lalruatdika (Teka) a awm. Goalkeeper-ah Zothanmawia (T. Mawia) a rawn kir.

Coach Lalsangzuala Hmarin 4-1-4-1 formation a rawn hmang a, defence hmaah Malsawmzuala awmin midfield-ah Moses Lalrinzuala, KC Malsawmsanga, Lalrokima leh Vincent Lalduhawma te an awm a, MS Dawngliana a mal tlat. Sanga'n ball thiam leh che rang rual a luhtir bakah Dawngtea a mal tlat tir avangin inkhel thunun a duh niin a lang.

Aizawl FC coach Victor Lalbiakmawia'n inkhel pawimawh tlarhnung a khawih che duh lo a, goalkeeper Lalhriatpuia awmin captain Lalchhawnkima leh C. Zomuanpuia te an inkawp a, Lalhrezuala leh H. Lalrempuia te mual sirah an awm. Defence hmaah Lalthankhuma a awm a, Cherhlun tlangval TK-a hi tun dinhmuna defensive midfielder ṭha ber zinga mi a ni.

Victor-a'n hma tawngah C. Lalhriatpuia a hmang a, player thar Malsawmzuala Tlangte leh Peter Lalrinhlua ten bul an ṭan. Peter hi C. Lalmuanpuia nen midfield-ah an inkawp a, Ramhlun Athletic laka chakna goal khungtu Sawma Tlangte hi Lalbiakdika nen mual sir aṭanga nawr turin an dah.

A hmuhnawm e

MPL inkhel hi a tlangpuiin a rang a, in veng miah loa innawr ṭum a tam. Nimin inkhel erawh team ṭha pahnih an nih miau avangin in veng tho siin an innawr a, player tinin an hna an hriat chian avangin ṭan phat aṭangin a hmuhnawm.

Ke vei lama ball pet thiam Sena Ralte mual vei lamah a hmuhnawm a, minute 15-na leka a ball cross ṭha zet chu Dawngtea'n goal zawnah a tauh thei lo. Chanmariin goal chance an neih hnu lawkah BD-a'n ṭha zetin a khalh lut a, Champhai Zotlang tlangval hian goal-ah ṭha zetin pet mah se Hmangaihsanga'n dang hman - hemi per hi T. Mawia'n a man leh bawk.

Inkhel a nung chhunzawm a, Baktawng tlangval tlan chak Vincent cross chu Moses tan goal khung theihna tur ni mah se Chanmari winger hian goal pawnah a chiah a pet out. Aizawl FC an reh rei lo, BD-a'n dinglamah chak taka lalutin a ball vawrhluh chu C. Hriata'n ṭha takin tauh mah se Chanmariin T. Mawia a nei tlat - a goal lo.

I League club hian first half tawp hma hretin freekick aṭangin chance an nei a, Muanpuia ball vawrhluh ṭha chu Sawma Tlangte-in goal pawnah chiah a tauh a, first half-ah goal a lut lo.

A hmuhnawm zel

Second half-ah Chanmariin Chawnpui laka goal khungtu PC Rosangzuala an luhtir a, inkhel a hmuhnawm chhunzawm. Sanga hoten bul ṭan ṭha hretin half chance ṭum hnih an insiam a, an khung lo ve ve.

Chanmari hian goal khung ngei tumin bench aṭangin Lalnunzama an luhtir thei a, Aizawl FC pawhin Augustine Lalrochana, Laltlanzova leh Fela Hlawndo te an luhtir thei bawk. Inkhel inhnehtawk tak ni a, goal chance erawh Chanmariin an nei ṭha hret.

Hun tawp hnaih lamah Dawngtea cross duhthusam chu Zama'n six yard box chhung aṭangin a pet out, Chanmari an vanduai. Hemi hnu pawh hian PC-a cross chu Aizawl FC keeper Lalhriatpuia'n hnek chhuak sualin Rokima'n goal-ah a rawn tauh nghal a, TK-a'n goal ruak aṭangin a pet chhuak.

Aizawl FC pawhin freekick hmangin hun ṭha an nei a, Zozoa'n box pawn chiaha an freekick chu wall pet per nan a hmanga, hemi hnu hian Fela Hlawndo pawhin freekick aṭanga goal khung theihna remchang chu engmah loah a chhuah bawk.

Engtin zel?

Aizawl FC coach Victor Lalbiakmawia'n inkhelh hmain, "I League club leh I League 3 club te chu kan danglam tur alawm," tiin sawi mah se nimin inkhelah erawh I League club an chungnung thei lo.

Inkhelh banah Victor chuan, "Kan player neih tur angte kan la lalut fel lo a, duh thlan tur kan la nei tlem. Chanmari erawhin position tinah duh hlan tur an ni," tiin an la kim loh thu a sawi.

Aizawl FC hian I Day Football hmaa match hnuhnung berah Mizoram Police an hmachhawn dawn a; July 30, Thawhlehni chhun dar 12:30 hian an inkhel dawn. Sanga hote July 29, Thawhṭanni hian Sihphir Venghlun an hmachhawn dawn thung.