Sihphir Venghlunin Ramhlun Athletic an lehthal

LZ Juice MPL11-ah Sihphir Venghlunin harhtharna an chang chhunzawm a, FC Bethlehem an hneh hnuah nimin khan Ramhlun Athletic 3-2 in an lehthal. RG Stadium-a inkhelah Ramhlunin Richard Lalramnunpuia leh Michael-a te hmangin goal khung hmasa mah se Sihphir Venghlun chu PC Lalruatsanga goal hnih leh Lalawmpuia goal hmangin an tho chhuak a, match zawnin hnehna an chang.

A goal tam

Sihphir Venghlun leh Ramhlun Athletic inkhel a nung lawk lo a, minute 25 chhung chu mual laiah ball an inpe kual a ni ber. Mahse, minute 26-naah Sihphir Venghlun goalkeeper Lalhruaizela'n ball a dang per hret a, Felix Lalruatsanga'n tibuai hmanin hemi per hi Richard Lalramnunpuia'n goal ruakah a khung.

Goal luh hnuah goal chance a awm mawlh mawlh a, Richard-a'n goal hnihna khung zuiah inngai mah se offside vangin pawm a ni lo. Minute 31-naah box pawn aṭangin Michael-a'n ṭha zetin a pet goal a, Ramhlunin 2-0 in hma an hruai.

Sihphir Venghlun talbuai deuh hman mah se chance an nei ve reng a, PC Lalruatsanga ke a hmui tawk lo a, thutlukna a siam sual leh ṭhin. Minute 36-naah erawh Sihphir Venghlun an vannei a, Lalawmpuia ball pet chu keeper Lalhriatpuia'n dang mah se goal ban a per hnuah AwP-a hian a khung leh ta tho.

PC-a pawhin chance ṭha a hlah ta reng lo a, minute 44-naah si phurh sutna goal a khung. Sihphir Venghlun goal hnih hi Malsawmtluanga Pautu siam ve ve a ni a, first half-ah 2-2 a ni.

PC-a a inlar

Second half-ah Sihphir Venghlunin bul an ṭan ṭha a, minute 51-naah AwP-a ball pass ṭha chu PC-a'n um lutin hmaruaina goal a khung. Sihphir Venghlun hi 2-0 in hnufual hman mah se minute 20 pawh tling loah goal thum khungin dinhmun ṭha zawkah an ding.

Sihphir Venghlun hi MPL11 match hmasa pahnihah chak lo mah se PC-a, Sawma leh Lalbiakzuala te awm hnuah an tho chhuak. Player pathum hi AIFF Futsal Championship-a Corbett FC champion puitute an ni a, MPL11-ah pawh an ṭangkai le.

PC-a hi AIFF Futsal Championship top scorer a ni a, MPL11-ah pawh match hnuhnung pahnihah goal hnih ve ve khungin goal li a khung tling der tawh. Sihphir Venghlunin FC Bethlehem an hneh ṭumin PC-a hi man of the match-a thlan an ni a, Ramhlun Athletic lakah pawh man of the match-a thlan a ni leh bawk.