Arsenal leh Calafiori an inhnaih

Arsenal manager Mikel Arteta chuan an squad chhah tawk lohna lai an tihchak tur thu a sawi a, nipui bazar hman laiah Italy defender Riccardo Calafiori chu an hnaih tawh hle a, an la lut ngei dawn niin a lang ta.

Bologna defender Calafiori hi pound maktaduai 34 man bawr vel a ni dawn a, kum 22 mi chauh a la nih avangin hmabak êng tak a la nei, tawnhriat a neih ṭhat tawh tho avangin mamawhna laia chhawr nghal theih tur a ni ang.

6ft 2in a sang Calafiori hi Roma aṭanga inzir chhuak a ni a, tlarhnung lai leh vei lamah a khel thei. William Saliba, Gabriel leh Ben White an awm a, Jurrien Timber a dam tawh bawk - an la a nih pawhin khel phak tur chuan a beih ve viau a ngai dawn a ni.

Gunners hi season thar inbuatsaih turin US khawpui pakhat Los Angeles lamah an feh chhuak a, manager Arteta-a'n defender Calafiori chungchangah thuthar a awm rih lo ti mah se, chanchinbu rintlakte chuan an inhnaih tawh hle niin an ziak thung a ni.

North London club hian tun hnai season hnih chhung chu Premier League nomawi an chawi teuh ṭhin hle a, mahse a tawpah chuan Pep Guardiola enkawl Manchester City an tluk lo leh ṭhin.

Euro final an khelh avangin England player ten squad an zawm tlai dawn, hei vang hian Arteta pawhin a player hman thiam Bukayo Saka leh Declan Rice te a chhawr tlai hret dawn, a tir aṭangin training an zawm dawn lo.

Arteta chuan, "A teuh ringawt a tawk lo, teuh taka kan awm a nih chuan champion phak ngei kha thil châkawm ber a ni. Tun hnai Premier League kal dan kan en chuan, champion tur chuan tihsual neih loh a ngai tluk a ni," a ti.

Squad leh player chungchang sawi zuiin Arteta chuan, "Nipui bazar nan hun a la tam a, club thuneitu lam nen pawh kan inbe zel, inthuam ṭhat kan ngaihna lai chu kan hria, chumi tur chuan hma pawh kan la.

"Player thar kan duh a, chutih laiin a pawimawh zawk chu kan neih sate hman thiam leh hmangaih taka enkawl hi a ni," a ti. Arteta hian a player-te a chhan thei hle a, an chet chhiat lai pawhin an lamah a ṭang tlat ṭhin.

Season thar inbuatsaih nan hian Bournemouth, Manchester United leh Liverpool te nen an inkhel dawn, chumi hnuah season dang ang bawkin Emirates Cup an buatsaih leh ang.

Premier League an match hmasa ber atan chuan August 17, Inrinni zan hian Emirates Stadium-ah Wolves an mikhual dawn a ni.