Olympic gold medal lak duh Djokovic

Novak Djokovic chuan Paris Olympic 2024 an neih turah Serbia tan gold medal vuak chhuah ngei a duh tih a sawi a, tun hma lama a la theih ngai loh hi a hun hnuhnungah tih ngei a duh.

Kum 37 mi a ni tawh a, a tan kumin hi Olympic hnuhnung ber a nih tawh a rinawm. Infiamna khawmpui lianah hian 2008 khan bronze medal a lo la tawh, a dang chu a la hlawh chhuak rih lo.

Serbian star Djokovic chuan, "Olympic khelh ngei hi ka duh dan a ni a, khel satliah loin kan ram tana medal ṭha ber hlawhchhuah hi ka thil tum leh duhthusam a la ni reng bawk.

"Olympic kan khelhna tur hi French Open kan khelhna hmun tho kha a ni a, hmanni lawka hliam vanga ka inhnuhdawhna hmun kha a ni, tun ṭumah erawh a boruak a danglam tawh ngei ka beisei," tiin a sawi.

Clay court inelna lian Roland Garros-ah khan quarterfinal khelh hmain a khup hliam vangin a buai a, hliam a neih kha June thla mai kha a la ni, zai niin a hnuah erawh Wimbledon pawh ṭha pangngai takin a khel thei leh tawh a ni.

Grand Slam nomawi 24 teh meuh nei mah se Olympic champion a la ni lo hi a lunglawm tikim lotu pakhat a ni. Tun hnaiah player chhuak thar ṭha tak tak an awm leh tawh a, a tan thil awlsam erawh a ni dawn lo.

French Open champion lai, hmanni lawka Wimbledon title la bawktu Carlos Alcaraz chu Spain tan a inlan dawn, ani hi seeded pathumna ni mah se rinkai ber a ni dawn, doubles huangah Rafael Nadal nen an inkawp bawk ang.

World number 1 Jannik Sinner chu seeded pakhatna niin, Italian tlangval dawtah hian Djokovic a awm thung. Mipa singles huangah hian ranking sang zual tak tak an inlan thei dawn a, gold medal lak chu thil awlsam a ni dawn lo.