De Bruyne a chhuak dawn lo - Pep

Manchester City manager Pep Guardiola chuan team innghahna Kevin De Bruyne an chelh tur thu a sawi. Belgian midfielder KDB hian kum khat chauh contract a nei tawh a, sum tamna Saudi Arabia pan tura sawi a ni.

De Bruyne hi kum 33 mi a ni tawh a, theihna sang tak la nei mah se a uai thla lam a ni tawh. Thla liam ta khan KDB chuan Saudi Pro League-ah sum a tam avangin sawmna a dawng a nih chuan a ngaihtuah tur thu a sawi a, Eithad Stadium chhuahsan mai tura ngaih a ni.

Mahse, Pep-a'n KDB theihna a hrechiang a, chhuahtir a tum lo. Spanish manager Pep chuan, "Kevin hi a chhuak dawn lo," tiin a sawi. Man City hian tukin dar 5:00 hian Celtic nen North Carolina, United States-ah friendly match an khel dawn a, hemi chungchanga media mite a kawmnaah KDB chungchang hi a sawi.

Man City hi Crystal Palace midfielder Eberche Eze nen sawizawm an ni a, goalkeeper Ederson erawh Saudi Pro League pan tura sawi thawm a awm. Pep chuan, "Kan club chhuahsan an awm a nih chuan, kan sawi zui ngei pawh a ngai ang. Transfer a tawp hma chu engmah a chiang lo a, eng emaw thleng thei chu a ni alawm. Chutihrualin, player thar pawh lalut thei chu kan ni. Mahse, ka ngaihdanah chuan 85 - 90% vel hi chu nikum squad anga kan khelhna chance chu a awmin ka hria," tiin a sawi.

Pep Guardiola hote hian season liam ta khan a zawna vawi li nan Premier League nomawi an chawi a, Man City-in Premier League nomawi paruk an nei ta bawk. Khawvel league harsa bera sawi ṭhin Premier League-ah Pep-a elpha an awm lo a, tun season-ah pawh nomawi humhim thei tura ngaih an ni.