Olympic zawhah Murray a chawl dawn

Andy Murray chuan tennis a chawlhsan dawn ta - Paris Olympic 2024 neih zawh hunah a chawl dawn tih a puang chiang tawh a ni, a tan inelna lian hnuhnung ber a ni ang.

Kum 37 mi Murray chuan, "Paris khawpuia inelna ka hmachhawn tur hi tennis tournament ka khelh hnuhnung ber a ni tawh ang. Great Britain tana ka inlan leh thei tur hi ka lawm, ka tan chuan chawimawina a ni," a ti.

World number 1 hlui hian Britain tan singles leh doubles match khelh a tum, a vanglai a pelh tawh bakah hliam vanga a buai fo avangin tun hma lama a boruak ang erawh phak a harsa tawh ang.

Beijing Games 2008-ah khan a vawi khat nan a inlan a, match hmasa berah Lu Yen-hsun hneh loin a tla nghal, kum li hnuah Olympic khel lehin Roger Federer hneh chung ngeiin London khawpuiah gold medal a vaw chhuak.

Rio 2016-ah khan Murray hi a champion leh a, mipa tennis player zingah singles huanga Olympic gold medal vawi hnih la thei hmasa ber a ni a, final hmuhnawmah Argentine mi Juan Martin del Potro a hneh.

Grand Slam nomawi vawi thum a chawi tawh a, a vanglaiin Federer, Rafael Nadal leh Novak Djokovic te nen an intawng a, player ropui zual bik pathumte nen hun an hman ho miau avangin major title lak hnem a harsa a ni.