India hnam puanzar keng tur Sindhu leh Sharath Kamal

Indian Olympic Association (IOC) chuan Paris Olympic 2024 hawnna hunah India hnam puanzar keng tur a tichiang. Badminton star PV Sindhu-i leh Table Tennis player A Sharath Kamal ten an keng dawn a ni.

IOA president PT Usha chuan, "Indian hmeichhe zinga Olympic medal la thei PV Sindhu leh Table Tennis ace A Sharath Kamal ten hnam puanzar an keng ang, anni hian vawi tam tak kan ram tan sulhnu ropui an lo hnutchhiah tawh," a ti.

Infiamna khawmpui lian hi July 26 aṭangin Paris khawpuiah neih a ni dawn, a kharna hunah hnam puanzar keng tur erawh kum dang ang bawkin a hnu lamah an puang leh ang - inelna neih huna langsarte tan kawng a inhawng ve leh ṭhin a ni.

Infiamna lama ram ropui ber United States pawhin an hnam puanzar keng turin LeBron James an ruat fel. Basketball star James chuan, "Khawvel pumin a ngaihven leh a thlir Olympic-ah kan ram tana chanvo pawimawh ka chang tur hi ka tan chuan thil hlu bik a ni," tiin a sawi.

Olympic hmachhawn tur hian ram hrang hrang an inbuatsaih mup mup - India pawhin theihtawp a chhuah, inelna neihna tur hmunah hian mi 257 a tir chhuak dawn a ni.

Indian contingent-ah hian infiammi 117 an ni dawn a, heng bakah hian support staff mi 140 an awm dawn bawk - Tokyo Games neihṭum khan India hian infiammi 121 a lo tir chhuak tawh a, tun ṭumah hian inlan tam lamah a phak lo deuh.