Merseyside VARby - Liverpool an vanduai
Inrinni zan Premier League inkhel boruak sangah Everton leh Liverpool chu 2-2 in an inhnehtawk a; inkhelh zawha sawi hlawh zawk erawh video assistant referee leh Virgil van Dijk a ni.
Liverpool-in Sadio Mane leh Mohamed Salah hmangin vawi hnih ngawt hma hruai mah se Everton-in Michael Keane leh Dominic Calvert-Lewin hmangin an chhanglet a, a tawpa Jordan Henderson goal khung chu pawm a ni lo.
Everton forward Richarlison hnawhchhuah a nih hnu, hun pek belhah Hendo hian chakna goal a khung ngei niin a lang - mahse VAR lamin assist-tu Mane chu a offside niin an ngai a, sawisel theih takin thutlukna an siam.
Mualneitu team keeper Jordan Pickford-a'n Virgil van Dijk-a kalh thluk avangin Dutch defender hi minute 11-naah lakchhuah a ngai a, VVD hi tun season chhung a chawlh a ngai mai thei a, thu chiang hriat a la ni lo.
Salah 100
Goodison Park-a inkhelah Covid-19 vanga Aston Villa hmachhawn thei lo Mane-a'n a dam tawh tih pholangin minute thumna lekah goal hmahruai a khung a, awlsam takin an chak dawn niin a lang.
Mahse Everton tan an player lei fuh ber ang hiala chhal theih James Rodriguez-a inlar a, Colombian midfielder corner pet chu Keane chuan goal-ah a chantir - keeper inhliam Alisson aia ding Adrian chuan a dang hman lo.
Minute 72-naah Salah a inlar ve leh a, Egyptian forward hian Liverpool tan match 159 a khelha a goal 100-na a khung.
Liverpool an chak ngei dawn niin a lang a, tun season Premier League a chak loh la nei lo Everton-in kut ruaka haw an duh bik lo tih an lantir thung.
Season duhawm tak hmangtu Calvert-Lewin-a'n club lian lakah pawh inthlahrun a tum lo tih pholangin minute 81-naah si phurh a rawn sut a, English striker dinhmun insiamrem dan ṭha tak leh a zuan sanna te chu 'class' tia sawi loh a thiang lo.
VAR vangin maw?
Minute 90 a ni tawh a, mahse ennawm titawp turin puanzar erawh khar a ni lo. Richarlison-a'n Pickford ang thoin âtthlak taka chet a thiam ve tho tih pholangin Thiago Alcantara lakah a foul a, red card nen dressing room lam kawhhmuh a ni.
Hun a tawp hnai tawh a, Hendo chuan Mane assist chu ṭha zetin goal-ah a chantir - Liverpool an lawm a, match 22 zet Reds laka chak zo tawh lo Everton an hnual rawih.
Mahse, mak tak maiin he goal hi VAR hmanga ennawn a ni a, rei zet ennawn a nih hnuah Mane chu a offside nia an ngaih avangin goal-ah pawmsak an ni lo - Liverpool an hawihai a, football fans an bang chuang lo.
VAR thutlukna hi 'a mak' tih bak sawi tur a awm lo a, vanneihnain Liverpool a hawisan a, Everton tan chuan VAR thutlukna hi lawm taka kut ben hnan mai chu a fuh zawk.
Thiago a thiam
Liverpool tan Thiago bawk a hmuhnawm a, pound maktaduai 20 man midfielder hi Reds-in 'instalment'-in a man an pe tih hriat tel phei chuan heti zat leka ani ang 'class' player an chang thei hi an vannei takzet.
Midfield 'roreltu' an tih huanga tel tlak khawpa thiam Thiago hi inkhel tluan mah se Richarlison-a foul avang khan a inhliam a, a chawlh chen tur puanzar a la ni lo. Richarlison chuan Liverpool midfielder hnenah hian ngaihdam dilna a thawn tawh thu a sawi.
Season duhawm lo tak hmangtu Pickford-a'n VVD laka a chet dan avanga red card a hmu lo chu a vannei a, card pek a nih loh chhan hi Dutch defender offside vang a ni a, ni lo se penalty pawh a chawi ngeiin a rinawm.
Pickford hian a hnuah erawh a tihsual thupin a che ṭha a, Joel Matip-a tauh luh tur ngei nia lang chu ṭha zetin a dansak a, Trent-Alexander Arnold-a freekick a dan pawh England number 1 a nih theih chhan pholangtu a ni.
Reds an lawm lo
Jordan Henderson goal khung chu pawmsak a ni lo a, career titawp thei hial khawpa hlauhawma VVD laka foul Jordan Pickford chu hnawhchhuah a ni lo bawk - Liverpool tan lawm taka pawm chi a ni lo.
Reds hi Premier League hnenah an zualko zui a, Merseyside derby a thil thleng pahnih hi ennawn turin an ngen. Liverpool boss Jurgen Klopp chuan, "Hendo goal khungah khan offside awmin ka hre lo a, mahse thutlukna siamtu chu midang an ni si," a ti.
VAR-in offside awm lo taka lang chu ennawnin offside-ah a ngai a, VAR hmanga ennawn tur niawm taka lang, VVD laka Pickford-a foul erawh ennawn a ni lo thung.
Klopp chuan, "VAR-in inrawlh ṭul a tih lohnaah kan player pakhat chu kan chân a, goal ṭha tak kan khung erawh pawmsak kan ni lo leh lawi si," tiin a hrethiam thei lo.
Siam chawp offside?
Derby boruak sangah, hun pek belhah Liverpool-in chakna goal an khung a, mahse VAR-in a pawm pui lo miau si. Liverpool captain Henderson chuan, "VAR hmang kha chuan a offside a ni ang e, chu chu mi zawng zawng duh dan pawh a ni.
"A chang chuan offside a awm ngei theih nan line hi an pawt thui lui nite hian ka hre ṭhin. Eng ang takin nge an kalpui hi ka hrethiam thei lo a ni," a ti a, a lawm lo hle.
Klopp chuan, "Dressing room ka luh khan ṭhenkhat chu laptop keng chungin an lo ding a, Mane offside dan an ennawn chunga an hriatthiam loh thu an sawi.
"VAR thlawptu ka ni a, ka thlalak hmuhah kha chuan offside a awm lo. Kha thil thlen hnuah khan vawi 10 vel interview ka hmachhawn leh tawh a, min kawmtu apiangin a offside loh thu min hrilh - rilru hnual tawhsa tih phur nan chuan ṭangkai lo tak a ni," a ti!
"Hendo goal chungchang kha chu vanduaithlak takin tih theih kan nei tlem hle. Jurgen a lawm lo hi ka hrethiam takzet a, chutih rual chuan kei erawh ka hlim em em thung a ni.
Point khat kan hlawhchhuah avanga hlim ka ni lo a, kan khelh dan avang zawkin ka lawm a ni. 1-0 leh 2-1 a kan hnufual avangin a harsa a, mahse kan inrintawkna kan hloh lo.
Team ṭha tak kan el thei tih kan pholang. Liverpool nen hian huang khatah kan awm ta e, ka tihna a ni lo a, mahse chu dinhmun thleng tur chuan theihtawp kan chhuah a ni. "
- Carlo Ancelotti, Everton manager
"Kan khelh dan aṭanga teh chuan ka lawm takzet.
Team pakhat, khelh fuh chhoh lai tak kan tawng a, inkhel thununtu kan ni thei a ni. Ka naute an khel ṭha a, team dik tak kan ni. He team enkawltu ka ni thei hi ka inchhuang takzet ."
- Jurgen Klopp, Liverpool boss