Marseille-ah Hojbjerg a lut

Ligue 1 club Marseille chuan Tottenham Hotspur midfielder Pierre-Emile Hojbjerg chu season khat chhung atan loan-in an hawh a, a loan hun a hman zawhah French club hian pound maktaduai 17-in an nghetin an la zui ang.

Denmark international Hojbjerg hian Southamp-ton aṭangin, kum 2020 khan Spurs hi £15mtd-in a zawm a, Jose Mourinho hnuaiah player pawimawh ni mah se, coach thar Ange Postecoglou chuan Yves Bissouma leh Pape Matar Sarr a ring zawk.

Hojbjerg hian season hmasa khan match 39 khel mah se, heng zinga match 10-ah chiah bul a ṭan a, midfielder Archie Gray (Leeds United) leh Lucas Bergvall (Djurgardens) ten tun nipuiah Spurs an zawm bawk avangin Hojbjerg tan chhuah hi a finthlak - London club tan hian inelna hrang hrangah match 184 khel hmanin, goal 10 a khung a, assist vawi 16 a nei.

Marseille hian coach atan Brighton & Hove Albion manager hlui Roberto de Zerbi la lutin, nipui transfer-ah an che na hle. Hojbjerg hma hian Mason Greenwood (Manchester United) leh midfielder Ismael Kone (Watford) an la lut tawh a, Arsenal striker Eddie Nketiah pawh an thlithlai nia sawi a ni.