Yoro hmintu Ferdinand

Manchester United-in Lille club aṭanga Leny Yoro an lakluh theih nan club legend Rio Ferdinand puihna an dawng. English club hian £52m sengin Yoro hi an lalut a, Rangers nen friendly match an khelh ṭumin a inlan tawh.

Kum 18 mi Yoro chuan, "Kar hnih liam ta khan minute 10 chhung kan inbia a, Man United chungchang kan sawi a, thutlukna siam kawngah min pui hle. Club nihna leh club sulhnu ropui tak min hrilh a, khawvel club lian ber a nih avangin club tana theihtawp chhuah tura inpeih reng a ṭul thu min hrilh," tiin Rio Ferdinand nen an inbiak chungchang a sawi.

Yoro pawh hi Ferdinand ang thoa centre back tho a ni a, player pahnih khelh an pawh hi a inanna chen pawh a awm. Ferdinand hian kum 22 liam ta khan £29.1m-in Man United hi Leeds United aṭangin a zawm.

Manchester United hian tun season-ah friendly match ṭum hnih an nei tawh a, Rangers 2-0 a an hneh hma hian Rosenborg lakah 1-0 in an tlawm. July 28, Pathianni zing dar 5:30 hian Arsenal nen friendly match an khel leh dawn a, Euro 2024 vanga inlan thei lo player-te pawh inlan thei tawh tura beisei an ni.