Messi pa leh Barca hotute an indawr

Lionel Messi pa leh a agent ni bawk Jorge Messi chuan Nilaini khan Barcelona president Josep Maria Bartomeu a hmu a, an thutlukna sawi tur la awm lo mah se an la indawr chhunzawm zel dawn niin an sawi. 

Spanish football journalist Guillem Balague chuan, "Enge thleng dawn sawi theih a awm lo," tiin a sawi a, Messi aiawhte hian chhuak tura zalenna an neih thu an sawi laiin Barca hian release clause an la behchhan ve tlat thung. 

Manchester City chu Messi lalut thei dinhmunah an la ding reng a, Balague chuan City hian, "Messi an hmin tawh," tiin a sawi a, hetihrual hian euro maktaduai 700-a lei chhuak tur erawh chuan a hlawha an sen tur zat nen an inhuam bik lo. 

Jorge hian, "A thlawnin a chhuak thei," tiin Bartomeu a hrilh a, Barca President hian, "Chhuak turin kan duh lo a, a chhuak duh ṭalh a nih erawh chuan release clause anga a chhuah a ngai ang," a ti thung. 

Tarlan tawh ṭhin angin Messi hian season tawp apianga a thlawna Barca chhuahsan theihna dan a nei a, Barca lamin hei hi June 10 khan a tawp tawhah an ngai - Messi-te lam hian season pawhsei a nih avangin a la hman theihah an ngai thung a ni. 

City hian Messi an lalut dawn a nih chuan kum khatah a hlawh atan euro maktaduai 110 bawr vel an insen a ngai dawn a, Balague chuan, "Ka thil hriat rukah chuan City hian a hlawh piahlama a man zat atan euro maktaduai 100 bawr vel sen an inhuam lo," a ti a, City hian heti zat budget-a khung len an harsat ve niin a lang. 

Jorge Messi-a'n Bartomeu nen an inhmuh hmaa media a kawmnaah, "A harsa takzet," tiin Messi hma hun a sawi a, nizan lama thutharah erawh Jorge hian a fapa chu a cham mai theih thu a sawi niin an tarlang. 

Spanish TV channel Cuatro-in Jorge Messi an kawmnaah, "A contract hmang zoin kum 2021-ah a chhuak mai ang em?" tiin an zawt a, "Aw," tiin a chhang niin a lang. Mahse, Messi aiawhte chuan hemi chungchang hi sawifiahin Jorge hian, "Ka hre bik lo," tiin a chhang niin an sawi!