Lazio hlim niah Napoli an ngui

Inrinni zan Italian Serie A inkhelah team ṭha pahnih dinhmun a inang lo hle. Lazio tan Ciro Immobile-a'n hattrick siama Sampdoria lakah 5-1 a hnehna an chan laiin, season hmasa pahnihna Napoli erawh an mikhual Fiorentina lakah 2-0 in an tlawm thung.

Lazio hian Serie A match an khelh hnuhnung 11-ah hnehna an chang vek a, an club record thar an siam. Champion lai leh hmahruaitu ni bawk Juventus aiin match khata khel tam chungin an inthlauhna chu point thum chauh a ni.

Immobile a ropui Season duhawm hmang mektu Immobile-a'n goal khung a chawlhsan thei lo, goal thum a khung bakah Felipe Caicedo leh Jacinto Quissanga ten goal khat ve ve khungin nuamsa takin hnehna 

an chang.

Kum 21 mi Immobile-a'n season kal laiah Serie A match 19 a khelh aṭangin goal 23 zet a khung tawh a, European league hrang hrang nena khaikhin pawhin hmatawng hriam leh hmuhnawm berte zinga mi a ni mek. Mikhual Sampdoria lamin goal nga an phurh hnuah Karol Linetty hmangin vawi khat chu chhanglet ve mah se awmzia a nei tawh lo, defender Julian Chabot hnawhchhuah a nih hnua goal an phurh belh lo chu an vannei zawk hle.

Gattuso a lawm lo Napoli manager Gennaro Gattuso chuan Forentina an hneh loh hnuin an fans lakah ngaihdam a dil. Italian pa chuan, "Kan khelh danah chak kan phu lo, inkhel hmuhnawm kan lantir lo bawk, fans lam hriatthiamna kan ngen e," a ti.

Fiorentina tan hian Federico Chiesa leh Dusan Vlahovic ten goal khat ve ve an khung a, mualneitu Napoli lamin a chhanletna an nei lo - Gattuso naute hi 12-naah an tlak thlak avangin a sang pali zinga tel phak pawh a harsa tawh khawp ang. Gattuso chuan, "Sawifiah mai pawh a harsa khawp mai, khelmual chhunga kan luh khan tum mumal kan nei ta lo emaw tih mai tur a ni. Thawhhona ṭha kan neih thuai a ngai a, hmalam pan turin player ten theihna an nei tih pawh ka hria," a ti.