Nouri pualin 34

Donny Van de Beeek chuan Ajax tana a khelhpui ṭhin a ṭhianpa Abdelhak Nouri pualin a jersey number hak ṭhin number 34 a ha dawn. Season thara United number 34 ha tur hi Dean Henderson a ni a, amaherawhchu Donny Van de Beek-a'n he number hi a rawn thlan tak avangin English keeper hian phal takin a lo kian a ni.

Dutch midfielder Van de Beek chuan, "A chanchin inhriat tawh ka ring. Lungphu chawl vanga harsatna a tawh hnuin a inkhel thei tawh lo. Ka ṭhian ṭha tak a ni a, a chhungte nen kan inpawh a, a unaupa hi ka ṭhian ṭha ber zinga mi a ni a, tun thlengin a chanchin hi kan la sawi dun ṭhin," tiin a sawi.

Van de Beek leh Nouri te hi kum 1997-a piang ve ve an ni a, Ajax-ah naupan tet aṭanga football zir dun an nih avangin an inkawm ngeih hle. July 2017 khan Nouri hi friendly match an khelh ṭumin lungphu chawl avangin a tlu a, a thluak a khawih avangin inkhel thei a ni tawh lo.

Nouri hi hun rei tak nikhaw hre loin a awm a, August 2018 khan a rawn harh chhuak. Kumin March 27 khan damdawi in aṭangin an inah hruai haw a ni a, a chanchin lungchhiatthlak tak avang hian football khawvel a deng chhuak hneh hle.