Italy leh Netherlands inlan zan

UEFA Nations League-ah zanin hian Italy leh Netherlands an inlan dawn. Roberto Mancini hote hian zanin dar 12:15 hian Bosnia and Herzegovina an mikhual dawn a, Oranje-in hemi hun vek hian Poland an hmachhawn dawn.

Italy hian 2006 World Cup nomawi an chawi a, hemi hnu hian tlak hniam lam an pan. Azzuri hian 2010 leh 2014 World Cup-ah group stage an paltlang lo.

European Championship-ah erawh 2012 khan final an thleng a, Spain lakah 4-0 in an chak lo. Euro 2016 kha Italy chhiat ber ṭumin niin an sawi a, chutihrualin quarterfinal an thleng hlawl. 

Amaherawhchu Italy hi an ṭha tak tak lo tih a hriat zui a, 2018 World Cup khel turin an inpetling zo lo. Inelna lian awm apianga rinkai ni ṭhin khan insiamṭhat an mamawh Roberto Mancini hnuaiah harhtharna an chang.

Azzuri hian Euro 2020-a inpetling turin an group-a awm Finland, Greece, Bosnia and Herzegovina, Armenia leh Liechtenstien te an hneh vek. Italy hian an match hnuhnung berah Armenia 9-1 zetin an sawp a, Europe team ṭha zinga chhiar an ni leh tawh.

Italy-in zanina an hmachhawn tur Bosnia and Herzegovina hi Euro qualifying-ah vawi hnih an hmachhawn a, an hneh ve ve. Juventus Stadium, Turin-a an mikhual ṭumin Lorenzo Insigne leh Marco Verratti te goal hmangin 2-1 an in hneh a, Bosnia tan hian Edin Dzeko-a'n a pet goal ve bawk.

An intawnna hnuhnung zawkah Italy hian 3-0 in an hneh a; Insigne, Francesco Acerbi leh Andrea Belotti ten goal khat ṭheuh an khung. Azzuri hian tun hnaiah player chhuak thar ṭha an kawl nual a, Serie A-a khel an nih deuh vek avangin khawvel huap angin an lar tawk lo.

Tun ṭuma an squad-ah pawh player pathum chiah Italy ram pawna khel an awm. Brazil-a piang midfielder Jorginho chu Chelsea tan a khel mek a, Everton forward Moise Kean leh Shanghai Shenua forward Stephan El Shaarawy te koh tel an ni.

Robert Lewandowski, Lionel Messi, Cristiano Ronaldo leh player ṭha dang aia season liam taa khung tam Ciro Immobile an kawl. Kum 28 mi Immobile hian season liam ta khan league-ah goal 36 tehmeuh a khung a, European Golden Shoe a dawng.

Lazio striker Immobile chuan, "Ka hlawhtlinnaah ka lawm a, inrintawkna ka ngah bawk. Mi tu pawhin club ang thoin ram tana ka khelh ṭhat an beisei a, keipawhin chet 

ṭhat ngei ka tum. Euro C'ship khelh hunah inpeih thlap ka tum," tiin nakkuma khelh tur European Championship chu a hmathlir a nih thu a sawi.

Italy hian goalkeeper hmabak nei êng Gianluigi Donnarumma an kawl a, tlarhnungah kum 36 mi Giorgio Chiellini (captain) leh Leonardo Bonucci ten an la ho thei a. Tlarhma lamah Immobile thlawp turin Nicolò Barella, Lorenzo Insigne, Andrea Belotti, Nicolò Zaniolo leh El Shaarawy te an awm a, hmabak an nei êng hle.

Ronald Koeman thlaktu lailawk coach Dwight Lodeweges hnuaiah Netherlands fiahin an awm dawn a, an khingpui tur Poland hi hming langsar tak ni lo mah se Robert Lewandowski awmna a ni. Tun ṭumah erawh Champions League champion zo hlim Lewandowski a awm dawn lo.

Oranje pawh hi Italy ang thoin 2010 chhoah an tla hniam a, 2014 World Cup-ah semifinal-ah thleng bawk mah se Euro 2016 leh 2018 World Cup khel turin an tling zo lo.

Chutihrualin Netherlands hian Koeman hnuaiah harhtharna an chang a, Liverpool defender ṭha mi Virgil van Dijk an kawl bakah tun hnaia Ajax-in player ṭha an chherchhuah an vanneihpui. Nations League hmasa berah Oranje hian final an lut hial a, tun ṭumah pawh hian a tawh khirh ber zinga mi an ni ang. 

Netherlands inkhel hi mi tam takin an ngaihven chhan tur chu Manchester United player thar Donny Van de Beek vang a ni dawn. Ajax aṭanga inzir chhuak Van de Beek hian bul a ṭan kher a rinawm loh. Oranje hian midfield pathumah Frenkie de Jong, Maarten de Roon leh Georginio Wijnaldum te an kawl a, tlarhmaah Memphis Depay, Ryan Babel, Steven Bergwijn, Quincy Promes leh Luuk de Jong ten an awm avangin duh thlan tur ṭha tak an awm thei ang.