Brazil hmeichhia leh mipa hlawh inang dawn

Brazilian football-a thuneitu sang ber Brazilian Football Confederation (CBF) chuan Nilaini zan khan thuchhuah siamin Brazil national hmeichhe team-te chuan mipa-te hlawh zat ang an lak ve tur thu an sawi. 

CBF president Rogerio Caboclo chuan March thla khan mipa leh hmeichhe team te hlawh inzat chungchang hi an lo rel tawh tih sawiin, "CBF chuan kumin March aṭang khan mipa leh hmeichhe team ten prize money leh allowance aṭanga sum an hmuh tur chu a inzat ni tawh turin a rel a ni," a ti. 

Brazil hmeichhe team-in mipa hlawh ang zat an hlawh tur thu hi March khan rel tawh ni mah se Covid-19 vangin March hnuah hian international match an la khel leh rih lo. 

Caboclo chuan, "Tunah chuan inthliarna a awm tawh dawn lo a, CBF chuan mipa leh hmeichhia te chu ang khat vekin a en a ni," a ti a, "Nakkum Olympic-ah pawh medal an hlawh chhuak a nih chuan mipa team-in medal an hlawhchhuaha an hlawh ang zat tho an hlawh ve ang," tiin a sawi zui. 

Brazil hma hian Australia, Norway leh New Zealand chuan an ram mipa leh hmeichhe team hlawh inzat turin an lo rel tawh a, football ram ropui Brazil meuhin hetianga thutlukna a siam takah chuan ram tam takin an hnung an zui tura ngaih a ni,.