Chelsea-in City Chelh

Chelsea fans chuan Manchester City-in Chelsea an chelh ding zawkah an ngai mai thei a, chik taka inkhel en erawh chuan Chelsea-in City an chelh hram tih hmuh hmaih chi a ni lo. Premier League inkhel pawimawhah Chelsea leh City 1-1 in an inhnehtawk.

Inrinnia Stamford Bridge-a inkhelah Chelsea-in Loic Remy hmangin minute 41-naah goal an thun a, City lamin an chhang lêt thuai a, minute 45-naah David Silva chuan goal thunin point khat ve ve an hmu. Chelsea-in point ngain hma an hruai zel a, inkhel result-a lawm zawk tur chu Chelsea an ni.

'Final' an khel e

Premier League-ah hian 'final' a awm a nih ngai chuan he inkhel hi final teuh ber a ni ang.

Point riata hmahruai theihna nei Chelsea-in an hnuai chiaha awm City an mikhual a, an thiampuipa Cesc Fabregas leh hrem tawk Diego Costa tel loin mikhual hi an hmachhawn.

City hi an tumah an chiang a, goal thun tumin an nawr nghal a; nimahsela manager Manuel Pellegrini chuan Chelsea tawngpawng nawr chu a him lo tih a hmu thiam a, a defender-te veng turin Fernandinho leh Fernando-te a din duntir. Jose Mourinho-in a tih tur a hria a, Nemanja Matic leh Ramires-te dah kawpin a tlarhnung a veng ve bawk a, 'midfield battle' a tam hle.

Minute khatnaah Chelsea goalkeeper Thibaut Courtois chuan hna a nei nghal a, minute 24-naah Sergio Aguero goal thun tur ṭha takin a dang zui bawk.

He mi hnua Oscar-a'n City goal-a a pet chu City keeper Joe Hart-a hna hmasa ber a ni a, a goal lo. Minute 32-naah John Terry chet sual nangchingtu Aguero chuan uiawm takin a hlah leh a, goal a la lut lo.

Minute 41-na a ni a, Eden Hazard-a ball pek phei chu Vincent Kompany chuan a pet per hman tura ngaih ni mah se a ke a tawm ta daih a, hei hi Remy chuan chaing zetin a thun a, Chelsea-in an chance ṭha hmasa berah an thun nghal - hei hi Chelsea chance hnuhnung ber a ni zui a, he goal a luh hnu hian inkhel tawp thlengin City goal-ah an pet leh tawh lo.

City-in an sût thuai a, Jesus Navas-a ball cross naran tak chu Chelsea goalkeeper Courtois chuan a lo man ṭhelh a, hei hi Aguero chuan rang zetin a pet phei a, goal pawna kal chiah tura ngaih a nihlaiin Silva chuan a rawn tlawh goal a, 1-1 a ni.

Second half-ah Chelsea-in an goal venhim an thlang a, goal an nawr meuh tawh lo a, City lahin an thun thei si lo - Milner, Fernandinho leh Navas-te'n half chance an nei tih mai loh chu chance ṭha tak a awm lo.

Minute 76-naa Frank Lampard-a lut pawhin danglamna a siam zo lo a, a danglamna awm chhun chu Chelsea fans ṭhenkhatin an lawma a ṭhenin an lawm lo kha ni deuh mai a, point khat ve ve an hmu ta a ni.

Inkhel thlir nawnna

Chelsea-in an player pawimawh ber pahnih an nei lo. An game-in a tuar. Goal thun thei ber Costa a awm lo a, a goal siamsak thiam ber Fabregas a inhliam bawk si a, an goal bawh a na lo.

City-in game hmuhnawm tak an lantir a; nimahsela Pellegrini naute hian tlar hmaah Aguero tih loh a laia goal nawr na tak an nei lo a, an tuar. Game thum chhung chak an nei ta lo a, hei hi season tawpah a pawi thei - striker thar Wilfried Bony an lei chûk chûk pawh hi thil mak a ni lo.

Silva pawimawhna a lang leh ta a, goal pawimawh a thun a ni mai lo a, City inkhel khaikhawmtu a ni a, a bikin Yaya Toure a awm loh avangin a hna a pawimawh lehzual. Navas-a khelh ṭhat ṭum a ni a, Milner pawh a taimain a thawkrim a, a tawpa player hlauhawm chu Aguero tho a ni a, an goal thun pawh a thawh rah a ni.

Chelsea-in khelh ṭhat loh châng pawha point hmuh an la thiam chhunzawm zel a, hun tawp dawnah striker la chhuaka defender luhtir pawi tilotu Mourinho hi a tumah a chiang - champion a tum a, Man City laka chak loh pumpelh a tum a ni ber mai. Chak loh a pumpelh ta ngei a, point ngaa hmahruai chungin season an hmang chhunzawm zel ang.

Hun tawp dawna chak tuma nawra 'risk lak' aiin goal chhuah loa point khata ṭin mai a finthlak tih Mourinho-in a hre chiang a, chutiang tur chuan player a rem khawm a, second half-a Hart-a goal an va bei miah lo pawh pawi a ti lo ang - point an insem a, a tum chu champion a ni tlat.

Mi pakhat thusawi

Inkhelh banah coach pahnih thusawi kan hre ṭhin. Mourinho a ngawi leh tlat tawh. FA leh mi hrang hrang laka lungawi lo Chelsea boss-in media a hmachhawn duh lo. City boss Pellegrini thusawi chiah kan hre thei.

Pellegrini chuan, "Champion inûm tawpna a ni lo a, hei hi final a la ni teuh lo. Point 45 hmuh theihna inkhel kan la hmabak," a ti a, an chunga point ngaa sang fâl tawh Chelsea umphak a la tum.

City boss chuan Chelsea khelh dan chu na taka dem duh chiah loin a sawisel thung a, "Team pahnihin khelh dan kan nei a, kan tana ṭha tura kan ngaih angin kan khel. Chelsea kha chak an tum lo chu ka ti lo a, draw tuma khel angin ka puh lo a; nimahsela kan khelh dan a inang lo hle a ni," a ti a, second half-a an goal venhim tuma khel ta Chelsea khelh dan chu 'indirect' takin a kâp a ni ber.

Mourinho ang bawka Real Madrid boss hlui ni ve tho Pellegrini chuan, "Keini kha chuan minute khatna aṭanga a tawp thlengin chak tumin kan khel a, chuvangin point khat lekah hian ka lungawi lo a, kan khelh danah erawh ka lungawi viau thung a ni," tiin a sawi.