Goal nen Sturridge a lo kir

Inrinni Premier League-ah Liverpool chuan an mikhual West Ham United 2-0 in an lo tlawm a, Daniel Sturridge chuan goal a khung. Manchester United an chak a, Tottenham Hotspur pawh an kal zel. Chak khât tak Everton an chak a, an hneh tak Crystal Palace hi manager thar Alan Pardew an neih hnua an chak loh vawi khatna chiah a ni.

Anfield an lâm e

Liverpool lamah captain Steven Gerrard aiah Adam Lallana a lut a, beisei pha lo Mario Balotelli hmuh tur a awm lo. Mipui ngaihven ber erawh inhliam vanga thla nga chhung chawl tawh Daniel Sturridge khelh dawn leh dawn loh a ni thung a, bench-ah ṭhuttir a nui.

Inkhel an ṭan a, Liverpool in an nawr nghal a, Lazar Markovic leh Phillipe Coutinho te'n West Ham tlar hnung an rum ṭhaih nghal a, mahse a goal lo ve ve. West Ham an buai a, chawlhlawk hma lawkin Liverpool striker hlui Andy Carroll an hnai takah a head goal lo tih loh chu chance dang an nei meuh lo.

Second half an ṭan a, Liverpool bawk a hlauhawm zawkah an ṭang a, Sterling, Coutihno, Markovic leh Lallana-te inkawp tlar hmaah an hmuhnawm hle. Minute 51-naah khel ṭha em em mai Sterling chuan Liverpool tan a thun ta nge nge. Minute 68 ah August hnua a vawi khatna atan Sturridge a rawn tlan lut a, field chhungah minute 12 chiah a awm hman tihin goal a rawn khung nghal!

Inkhel tawpah Liverpool 2-0 in an chak a, an lawm khawp ang. Hei aia an lawmna tur erawh Sturridge a dam leh tawh a, goal a rawn khung nghal hi a ni ngei ang.

Liverpool manager Brendan Rodgers chuan, "League Cup-a Chelsea kan hneh loh khan kan rilru a tihnual hle a, tun season-a khel ṭha thei tak West Ham khelh hi a harsa dawn tih kan hria a, mahse, kan theihtawp kan chhuah a, kan bei a, kan sual a, kan nawr na em em mai a, ka player-te'n an khel ṭha hle a ni," a ti.

Sturridge chungchang sawiin, "A ni hi chu 'top class player' a ni. Chance in pek zeuh chuan goal=ah a chantir nghal ang, Coutinho pass kha a ṭha bawk em a ni, " a ti a, goal siamsak tu Coutinho a fak tel.

United-in phuba la

Leicester City hian King Power Stadium-ah United hi 5-3 in lo hneh tawh mahs e, tun hnaiah an che buai a, Premier League table mawngah an awm. Inrinni khan Old Trafford-ah an lenglut a, khual-mualah thilmak an thlen nawntir thei lo a, United in 3-1 in an lo hneh.

United tana lawmna belhchhahtu tur chu goal an khung hleih theih loh vanga mualpho mek Robin van Persie leh Radamel Falcao-te'n goal an khung hi a ni ngei ang. RVP hian minute 27-naah goal hmahruai hi a khung a, a offside a ang hle! Hei hi Falcao chuan minute 32-naah a chhunzawm ve leh a, minute 44-naah Wes Morgan chuan anmahni goal-ah tilut palhin half time-ah United-in 3-0 in hma an hruai.

Leicester City hian minute 80-ah Marcin Wasilewski hmangin goal khung ve leh mahse, goal thum lai an chhuah avangin an chak zo ta lo a ni.

Inkhel dang

Tottenham Hotspur-in Harry Kane-a goal hnih leh Christian Eriksen goal chhawr ṭangkaiin West Brom 3-0 in an hneh. League Cup final an luh bakah tun hnaiah an khel ṭha tluang hle a, heti chung hian Spurs manager Mauricio Pochettino chuan palina nih lama n la ngaihtuah lo a, an khelh hmabak zelah bak rilru an pek loh thu a sawi.

Sunderland-in an khelmualah an player lak thar Jermain Defoe an chhawr ṭangkai nghal a, Defoe hian goal khat khungin Connor Wickham goal khat nen 2-0 in Burnley an hneh. Newcastle United-in khual-mualah Remy Cabella, Sammy Ameobi leh Yoan Gouffran-te goal thun chhawr ṭangkaiin 3-0 in Hull City an hneh.

Everton-in minute hnihna leka Romelu Lukaku goal thun an chakpui a, game riat zet hneh an neih loh hnuah Crystal palace 1-0 in an hneh. Stoke City tan Jonathan Walters chuan hattrick a siam a, Queen park Rangers lakah a team-te 3-1 in a chakpui.