Wolfsburg lakah Bayern Munich an mualpho
Kumthara Bundesliga inkhel hmasa berah Bayern Munich an mualpho nghal. Zirtawpni zan khan Bayern Munich-in an mahni hnaih bertu VFL Wolfsburg lakah 4-1 in an tlawm. Volkswagen Arena-a Bayern goal chhuah zat hi season chanve hmalam match 17-a an goal chhuah zat nen a intluk chiah.
Wolfsburg-in minute lina lekah Bas Dost hmangin hma an hruai nghal a, Dutch forward hian first half injury time-ah a volley goal leh bawk.
Second half-ah mualneitu bawkin bul an ṭan ṭhaa, minute 53-naah Kevin De Bruyne-a'n Wolfsburg goal thumna a khung. Minute hnih hnuah Bayern tan Juan Bernat-a'n khung ve bawk mah se point hlawhchhuak tur khawpin an khel ṭha lo. Belgian midfielder De Bruyne-a'n minute 73-naah goal dang a khung leh a, minute 90 zawhah Wolfsburg 2-0 in a chak.
Bayern hian elpui ber an hneh zawh loh avangin pahnihna Wolfsburg nen hian an inkarah point riat chiah a awm tawh.
Chak result bakah Wolfsburg tan thu lawmawm dang a awm. Germany World Cup champion puitu Andre Schurrle chu season chawhnu lamah an chhawr thei dawn niin a lang. German club hian Chelsea aṭangin pound maktaduai 22-in Schurrle hi an la lut dawn nia sawi a ni.
Malanda pualin
Inkhelh ṭan hmain January 10-a car accident vanga boral Wolfsburg midfielder Junior Malanda hriatrengna hun hman a ni. Minute khat chhung ngawi renga mipui an din hnuah Wolfsburg supporter-te chuan banner-a 'forever in our hearts' tih chuanna an pho lang.
Record a tawp
4 Bayern hian April 2009 khan Wolfsburg 5-1 in an hneh lo a, khami hnua league-a goal li an chhuah lehna hmasa chu tun
ṭum hi a ni. Bayern mualpho hmasak zawk ṭuma champion chu Wolfsburg an ni.
4 Wolfsburg forward Bas Dost-a'n Bayern lamah goal hnih a khung a, Bundesliga game 102 (kum thum chhung) hnua Bayern lama goal hnih khung leh thei hmasa ber a ni.
4 Season liamta April thla hnua Bayern chak loh lehna hmasa ber a ni.
Engnge an sawi?
Goal hnih khungtu Bas Dost chuan, "Tumahin Bayern hi kan sawp an ring lo ang. Amaehrawhchu a tir aṭanga a tawp thlenga kan khelh ṭhat avangin chak hi kan phu a ni. Hei aia result duhawm hi a awm thei tawh lo," tiin a sawi.
Wolfsburg keeper Diego Benaglio chuan, "Bayern hneh theihna chance kan nei tih chu kan hria a, mahse hetiang zat em em a kan hneh hi kan ring lo. Thlasik chawlh hnua khelh a nih avangin Bayern kha an theihna zawng zawng an lantir thei lo a, engpawhchunise chak phu zawk chu kan ni," tiin a sawi.
Bayern keeper Manuel Neuer chuan, "Chhiatrupna a ni lo. Season chawhnu lam bul kan ṭan fuh tawk lo mai a ni. Tuna kan result chhe tak hi kan theihngilh ang a, kan inkhelh leh hunah chuan kan insiamṭhat theih ngei ka beisei," tiin a sawi.
Bayern midfielder Bastian Schweinsteiger chuan, "Tihsual kan ngah lutuk deuh a ni. Counter attack hmangin vawi tam tak min nawr a, team ṭha tak laka kan chetsual fo chuan chak lo tur kan ni. Kan chetfuh loh ṭum a ni a, kan theihngilh a ṭul a ni," tiin a sawi.
Bayern boss Pep Guardiola chuan, "Wolfsburg ka lawmpui. An khel ṭha a, chak an phu a ni. Keini erawh kan khelh dan thlirin chak loh kan phu a ni," tiin a sawi.
Inkhel Results
Wolfsburg 4 - 1 Bayern Munich
Schalke 1 - 0 Hannover
Mainz 5 - 0 Paderborn
Freiburg 4 - 1 Eintracht Frankfurt
Stuttgart 0 - 1 Borussia M'gladbach
Hamburger SV 0 - 2 FC Cologne
Bayer Leverkusen 0 - 0 Borussia Dortmund