African Cup of Nations Semi-final-ah DR Congo leh Equatorial Guinea an lut

African Cup of Nations khelh mekah Democratic Republic of Congo leh Equatorial Guinea-te'n semifinal an lut.

DR Congo in Congo lakah si hnih phur hmasa mahse Mbokani Bezua chuan DR Congo tan goal hnih khungin Jeremy Bokila leh Joel Kimwaki-te'n an khung belh a, 4-2 a chakin semi-final an lut. Congo DR hian Ivory Coast leh Algeria inkhela chak zawk an tum ang.

Quarter final dangah Tunisia lakah Equatorial Guinea an vannei. Tunisia lamin 1-0 in hma hruai reng mahse minute 90-naah Equatorial Guinea in penalty sawisel hlawh tak an hmu a, Javier Balboa chuan khungin hun pangngaiah 1-1 in an in draw.

Extra time an khel a, Equatorial Guinea tan Javier Balboa bawk a lo lang a, minute 102-naah goal khungin Equatorial Guinea vannei zawkah an ṭang ta a ni. Equatorial Guinea hian Ghana leh Guinea inkhela chak zawk an tum dawn thung a ni.