Manchester United an tho chhuak

Ole Gunnar Solskjaer-a'n Newcastle United an hma-chhawn hmain tun hnaia che chhia captain Harry Maguire chua thawh chhuah leh vat tur thu thu a sawi. Inkhelh banah erawh Maguire chauh ni loin Manchester United an tho chhuak a, Newcastle 4-1 in an hneh.

Inrinni zan St James Park inkhelah Luke Shaw-a'n minute hnihna lekah anmahni lamah a ti lut palh. Tottenham Hotspur laka 6-1 a mualpho hlim Man United dinhmun a chhia a, player hming langsar Paul Pogba, Donny van de Beek leh player thar Alex Telles te bench-a dahtu Solskjaer hmabak a thim hle.

Man United an insiamrem a, Juan Mata leh Bruno Fernandes ten wall pass hmanga Newcastle tlarhnung ṭhiatin Fernandes-a'n minute 20-naah mawi zetin pet goal mah se VAR-in a pawm lo - a offside. Amaherawhchu minute thum hnuah Man United captain Maguire-a'n Mata corner pet chu ṭha zetin a tauh goal.

Second half-ah Newcastle-in chance an nei hmasa zawk. English forward Callum Wilson-a ball pet ṭha zet chu David de Gea-a'n a dang a, Spanish keeper ṭha mi hmuh a ni leh ta. 

VAR-in United a pui a, Marcus Rahsford-a penalty hlawh chhuah chu Fernandes-a'n a pet a, Newcastle keeper Karl Darlow-a'n a dansak.  

Solskjaer-a'n bench aṭangin Pogba leh Van de Beek-te a luhtir a, substitute awmze a nei an ni. Minute 86-naah Van de Beek-a'n counter attack ṭanin Fernandes, Mata leh Rashford-te an inrawlh hnuah Portuguese midfielder-in goal class zet a khung.

United goal luh dan hi ennawnin a mawi lehzual a, player mimal tin thiamzia a lang. Minute 90-naah Aaron Wan-Bissaka-a'n United tana match 50-naah goal ṭha tak a khung a, Anthony Martial awm loh lang lo khawpa khel ṭha Rashford-a'n injury time minute ruknaah a pet goal.

Fernandes leh Mata ten football mawina an pholang a, United game tihmuhnawmtu an ni. Chutih rualin bench ṭanga lut Pogba leh Van de Beek-te hming lam hmaih a thiang lo. Solskjaer-a'n sawiselna nasa tak karah thutlukna a huaisen a siam a, fak a phu. 

United hian Thawhlehni zan hian season liam ta Champions League finalist Paris St-Germain hmachhawn turin France an pan ang.