AS Roma-in point an hloh

Inrinni zan khan AS Roma leh Empoli-te 1-1 in an inhnehtawk a, Serie A inkhel dangah Genoa leh Fiorentina-te hetiang zat bawk hian an inhnehtawk.

Roma-in Stadio Olimpico an tlawh hma hian league match vawi nga an khelhah vawi li an inhnehtawk a, hmahruaitu Juventus nena an inthlauhna zat chu point ruk a ni.

Inrinni zanah Roma defender Kostas Manolas-a'n minute 37-naah Empoli midfielder Riccardo Saponara a tih tluk vangin penalty a chawi a, hnawhchhuah a ni bawk. Empoli tan Massimo Maccarone chuan penalty aṭangin hmahruaina goal a khung.

First half tawp hma hretin penalty hlawhchhuaktu Saponara chuan yellow card vawi hnihna hmuin hnawhchhuah a ni. Second half-ah team pahnihin player 10 ve ve in an khel a, Roma an chungnung zawk.

Minute 57-naah Brazilian fullback Maicon hmangin Roma-in an si phurh an sut a, chak tumin an nawr zui bawk. Roma substitute Davide Astori-a'n crossbar a pet per a, amaherawhchu goal dang a luh belh lo.

Nizan khan Juventus leh Udinese te an inkhel a, champion lai Juve hi an chak a nih chuan Roma nena an inthlauhna hi point kuaah a khai chho ang.