Australian Open Serena a la tar lo; Djokovic a kal zel

Kum 33 a ni a, tennis player tam berte anb chawl tawh. Serena Williams a la chawl lo a, Australian Open-ah a champion.

Inrinnia Australian Open hmeichhe final-ah mipui hmuch chak Serena leh Maria Sharapova te'n final an khel a, world no.1 Serena chuan world no.2 Sharapova chu 6-3 7-6 (7-5) in a hneh.

Mipa lamah Novak Djokovic chuan Roger Federer leh Rafael Nadal-te huanga luh tumin a ropuina a belhchhah zel a, nimina final-ah Andy Murray chu 7-6 (7-5) 6-7 (4-7) 6-3 6-0 in a hneh a, Australian Open-a a vawi rukna atan a champion.

Serena a la tar lo

Inkhel ṭan tir set khatna an khelh laiin ruah sur vangin inkhel hi rei lo te chawlh a ni a, nuamsam lo chunga Australian Open final khel Serena hi a luak a chhuah avangin court a chhuahsan a ngai nghe nghe. Heti chung hian darkar khat leh minute 51 bak Sharapova hneh nan hian Serena hian a mamawh lo.

Serena hi Grand Slam-ah vawi 19 a champion ta a, hmeichhe tennis player zinga Grand Slam singles-a vawi 22 champion-a champion ngun ber Stefi Graf a ûm zel.

Serena chuan, "Grand Slam title 22 lak theih ngei ka duh a, mahse 22 tlin tur chuan 20-na ka lak leh phawt a ngai a, chumi zawhah a 21-na ka lak a la ngai leh cheu dawn a ni. Tun hnaiah players ṭha tak tak an rawn chhuak a, Grand slam title 22 lak chu thil harsa tak a ni dawn a ni, " a ti.

A hneh tak Sharapova chu fakin Serena chuan, "Maria hi lawmpui tur ka ni. Game ropui tak khelin inkhelh chhung zawng khan min tibuai em em a ni, " a ti. Sharapova nena final an khel chu a lawm thu sawiin, "Maria khan a khel ṭha a, fan-te tan mai pawh ni lo ka tan ngei pawha final ropui tak a ni. Final-a Maria Sharapova ka tum hi ka inchhuang hle a ni," a ti.

Tun hnaia Serena leh Maria Sharapova-te inkhelh hnuhnung16-ah Serena hi a chak vek.

Sharpova chuan a chak loh a tuar thiam hle a, "A chak lo zawka ṭan hi thil nuam a ni lo, mahse inkhel hautak tak hmachhawn kha nuam ka ti a ni," a ti. Final a lut hrim hrim chu a lawm thu sawiin, "Tennis game ropui tak kan khel a, final ropui taka player pakhat zawk ka ni hi ka inchhuang a ni. TV-a a entu nih ai chuan a ropui zawk e," a ti.

Djokovic a ropui zel

Kum 27-a upa Djokovic hi a vawi riatna atan Grand Slam-ah a champion ta a, khawvela tennis player ropui zingah ziah luh a ni zel ang.

Djokovic leh Murray hi Grand Slam final-ah vawi nga an intum tawh a, Djokovic hi vawi thum a chak a, Murray hi vawi hnih a chak.

Nimina final inkhelah hian a tir lamah inhnehtawk hle mah se Serbian star hian set thumna aṭangin ro a rel a, set linaah awlsam takin a chak ta a ni.

Champion thar Djokovic chuan Australian Open chu a kum telin a ropui tawlh tawlh tih a sawi a, "Vawi nga champion-a player ropui zinga ka tel ve thei hi ka lawm a ni," a ti a, kum tharah ṭha taka kir leh a tum thu a sawi.

Hingis leh Paes an ropui

Martini Hingis chu kum kaw hnuah Grand Slam-ah a champion leh ta a, mixed doubles-ah Indian tennis star Leander Paes nen inkawpin an champion.

Kum 34-a upa Hingis hi kum 2013 khan doubles khel turin a lo kir leh a, veteran Paes nen inkawpin final-ah Daniel Nestor leh Kristina Mladenovic-te chu 6-4, 6-3 in an hneh.

Kum 41-a upa Paes hi Grand Slam-ah vawi 15 a champion ta a ni.

Doubles result

Mipa doubles lamah Italian tlangval pahnih Fabio Fognini leh Simone Bolelli-te inkawpin French mi Nicolas Mahut leh Pierre-Hugues Herbert-te inkawp chu 6-4, 6-4 in an hneh a, an champion.

Hmeichhe doubles-ah American Bethanie Mattek-Sands leh Czech mi Lucie Safarova-te pahnih ṭang dun chuan 6-4, 7-6 (7-5) in China nula Zheng Jie leh Taiwan lam mi Chan Yung-jan-te inkawp an hneh.