Madrid khaw club-te an chak chiang

Inrinni zanah Madrid khaw pahnih Real Madrid leh Atletico Madrid-te'n an khingpui an sawp ve ve.

Santiago Bernabeu-ah Karim Benzema goal hnih bakah James Rodriguez leh Sergio Ramos-te goal hmangin Real Madrid-in hnehna an chang a, Real Sociedad 4-1 in an sawp. Atletico hi Copa del Rey aṭanga an tlak hnuah an insiam ṭha nghal a, Eibar 3-1 in an hneh.

Real nge nge

Cristiano Ronaldo chu hrem vangin Real Madrid tan a inlan thei lo a, James Rodriguez chu Portuguese star aiawhtu a ni a, a che ṭha hle.

Nikum September thla khan Anoeta stadium-ah Sociedad-in 4-2 in Real Madrid hi an lo hneh tawh a, Inrinni zanah pawh David Moyes leh a hote'n bul an ṭan ṭha hle.

Minute khatna lekah Aritz Elustondo tauh luh hmangin Sociedad-in hma an hruai nghal a; amaherawhchu goal hmahruai hi Real chhaih kawlhtu chauh a ni.

Minute hnih hnuah James hmangin Real Madrid-in an sut a, Sociedad player pawimawh Carlos Vela chu inhliam vangin minute 17-naah lak chhuah a ni bawk.

Mexican forward thlak a nih hnuah Real-in inkhel an thunun a, first half tawp hma minute riatnaah Sergio Ramos-a'n hmahruaina goal a khung. Spanish defender hian La Liga-ah goal 41 a khungna chiah a ni.

Second half-ah Karim Benzema dal zo an awm lo. French forward hian minute 52-naah goal thumna a khung a, minute 76-naah goal dang a khung leh bawk.

Real hian chance ṭhahnem tak nei mah se goal li bak an khung lo a, hun tawpah 4-1 in an chak.

Real Madrid boss Ancelotti chuan, "Cordoba leh Atletico kan khelh ṭum ang bawkin hma takah goal kan chhuah a, kan insiamṭhat a ṭul a ni," tiin goal an chhuah hma thei lutuk chu pawi a tih thu a sawi.

Italian manager chuan sawi chhunzawmin, "Kan inkhel hrim hrim erawh a ṭha a, Benzema hi box chhungah player danglam bik a ni," tiin a sawi.

Ancelotti hian an player thar Lucas Silva chu match fitness neih loh vanga tel lo a nih thu a sawi tel bawk.

Atletico an tho

Nilaini zana Barcelona laka tlawm Atletico Madrid-in Inrinni zanah inkhel thunun chungin Eibar 3-1 in an hneh.

Atletico tan Antoine Griezmann chuan minute minute sarihna lekah goal hmahruai a khung a, French forward hi inkhel hnuhnung paruka goal riat khung thei a ni. Tunlai football khawvela hmel thar langsar ber pawla ngaih a ni.

Minute 23-naah Griezmann cross ball ṭha tak chu Mario Mandzukic-a'n goal-ah a chantir a, minute li hnuah Croatian forward hian goal dang khung belh lehin 3-0 in first half a tawp.

Goal thum an khung hnuah Atletico-in goal venhim hna an thawk a, hun tawp hma hretin Eibar tan Federico Piovaccari-a'n goal khat a khung ve hram.

Atletico boss Diego Simeone chuan, "Kan duhah kan chiang a, kan khel ṭha tel bawk. Inkhelh ṭan tirh phat aṭangin kan che ṭha a, Griezmann kha kan team chakna hnar a ni," tiin a sawi.

Inkhel Results

Rayo Vallecano 1 - 2 Deportivo

Real Madrid 4 - 1 Real Sociedad

Eibar 1 - 3 Atletico Madrid

Granada 1 - 0 Elche

Celta de Vigo 1 - 0 Cordoba