2015 Asian Cup champion Australia

Extra time-a James Troisi goal hmangin Australia-in South Korea 2-1 in an hneh a, 2015 Asian Cup champion an ni.

Inrinni tlai khan Sydney-ah Asian Cup final khelh a ni a, yard 25-na aṭanga Swindon midfielder Massimo Luongo goal khung hmangin Australia-in hma an hruai a, first half-ah 1-0 a ni.

South Korea-in inkhel chanve hmalam thunun chungin goal an khung thei lo a, second half-ah erawh team pahnih an inhnehtawk avangin Australia chu champion mai tura ngaih an ni.

Amaherawhchu, injury time-ah South Korea captain Ki Sung-yueng thawh ṭhat zarah Son Heung-min hmangin an si phurh an sut a. Stadium Australia-a Red Devils ṭantute thawm a ṭha hle.

Australia hian kum li liam ta khan 2011 Asian Cup final-ah Japan chu extra time-ah an hneh lo a, tun ṭumah erawh extra time-ah an vannei ta. Minute 105-naah substitute Troisi-a'n chakna goal a khung.

South Korea hi Asian Cup-a an champion hnuhnun ber chu kum 1960 daih tawh kha a ni.

Eng nge an sawi?

South Korea coach Uli Stielike chuan, "Cup hawn ta lo mah ila kan khel ṭha em em a, mi tam tak thinlungah chuan champion kan ni tho. Kan vanneih ṭum chu nise champion thei kan ni tih chu a chiang a ni," tiin a sawi.

South Korea hian final-ah chiah goal an chhuah a, hemi hma inkhel pangaah goal an chhuah lo. Group stage-ah final-a an hneh loh Australia hi 1-0 in an lo hneh tawh bawk.

Australia champion-na kawnga player pawimawh Tim Cahill chuan, "Asian Cup champion hi Australia-in football-a a hun tawn ropui ber a ni," a ti hial.

Everton player hlui Cahill hian ram tan vawi 83 khelhin goal 39 a khung tawh a; Australia tana goal khung tam ber a ni.

Australia coach Ange Postecoglou chuan, "Kan ramah ngei kan champion a, kan hlawhtlinna hi kan kal zelna tura min fuihtu ṭha tak a nih zel ka beisei. Australia mipui tan Asian Cup hi a hlu a, thui tak kan thleng tih lantirtu a ni. Thlen chin bituk ka tum lo, a sang thei ang ber thlen zel kan tum tur a ni," a ti.

Australia hian Russia-a 2017 FIFA Confederations Cup khelh turah Asia ai an awh dawn ta a ni.

Australia hi

2015 Asian Cup champion Australia hi confederation pahnih hnuaia champion thei hmasa ber an ni. Kum 1980 leh 2004 chhung khan OFC Nations Cup-ah ṭum li an champion a, Oceania hnuaiah elpui tham an nei lo.

Australia-in hma sawn zel an duh a, Oceania chhuahsan can duh a, AFC_ah dilna an thehlut.

AFC executive committee-in March 13, 2005 khan Australia hi Asia khaw­mualpui hnuaia awm turin an sawm a, OFC executive committee pawhin Australia chhuah dilna a pawmpui ve leh bawk. FIFA-in June 30, 2005 khan Australia chu AFC hnuaia awm a phalsak.

January 1, 2006 aṭangin Australia chu official-in AFC hnuaiah an awm ta a, amaherawhchu OFC hnuaiah 2006 World Cup Qualifier an lo khelh tawh avangin 2006 World Cup chu OFC aiawhin an tel a. Germany-a World Cup khel tur hian Australia hian playoff-ah Uruguay an hneh.

Numbar zawnga thlirna

2015 Asian Cup hi Janaury 9-31 khan khelh a ni a, Australia rama khawpui pangaah khelh a ni.

Inelnaah hian match 32 a awm a, goal 85 a lut - match tinah goal 2.66 lut ang a ni. Stadium-a inkhel entu zawng zawng hi record aṭanga a lan danin 649,705 an ni a, match tinah entu mipui 20,303 awm ang zel a ni.

Lawmman

Team 16 telna 2015 Asian Cup-ah UAE forward Ali Mabkhout chuan goal 5 khungin top scorer a ni. Australia hian Fairplay Award an dawn bakah an midfielder Massimo Luongo chu best player a ni a, Matthew Ryan chu best goal keeper-ah thlan a ni.