ISL bazar a ngaihnawm

November 21 aṭanga khelh ṭan tur Indian Super League-ah club an bazar chhunzawm zel a, Kerala Blasters chuan Argentine attacking midfielder Facundo Pereyra chu kum khat chhung an hnena khel turin an lalut. 

Kum 32 mi player hian Blasters-ah hian kum khatah nuai 73.51 a hlawh ang a, bonus a tel bawk ang. Greek club PAOK tan pawha lo khel tawh player hian an ram Argentina bakah Chile, Mexico leh Azerbaijan lamah te pawh a lo khel tawh a, a tawnhriat ringawt pawh hi ṭangkaipui tham a ni ang. 

Hetihlai hian Barcelona laka an coach Albert Roca an chan hnuin Hyderabad FC chuan coach turin Manuel Marquez Roca an lalut a, kum 2017 khan La Liga-ah Las Palmas a lo kaihruai tawh. 

Jamshedpur FC chuan Alex Monteiro de Lima an lalut bawk a, Brazilian midfielder hi Major League Soccer lamah Chicago Fire leh Houston Dynamo tan pawha lo khel tawh a ni. 

Odisha FC-in goal khung turin Brazilian forward Diego Mauricio an lalut a, kum 29 mi forward hi Brazil Under 20 tana Neymar te nena lo khel ho tawh a ni a, Brazil Serie A lamah Flamengo tan a career a ṭan.

Asia lamah Chinese Super League, South Korean league sang ber K League 1 leh second division K League 2-te pawh a lo khel tawh a, India ramah pawh tlangnel nghal a tum ang.