James Rodriguez-a'n Everton-ah medical nei

Real Madrid attacking midfielder James Rodriguez chuan Everton-ah nimin khan medical a nei a, a man zat hi euro maktaduai 20 chuang tura ngaih a ni.

Kum 29 mi forward hi Everton boss Carlo Ancelotti hnuaiah Real leh Bayern Munich tan a lo khel tawh a, Spanish champion-ah a tlak tlum bawk si loh avangin amah hrechiangtu Italian coach awmna lamah kum thum chhung khel turin contract a ziak ang. 

World Cup 2014-a match nga a khelha goal ruk a khung vanga Golden Boot dawngtu hian World Cup-a hming a chher avangin kum 2014 nipuiah Real Madrid a zawm a, hetihlaia a man zat hi pound maktaduai 71 thlenga sang chho thei tura tih a ni. 

Mahse, Zinedine Zidane-a'n Real a enkawl hnuah James a tla tlum lo a, Premier League lam a hawi ve ta - Everton tan chuan James-a 'class' player lakluh hi Premier League 'Big Six' hnena an zuamawm loh turzia pholanna ṭha tak a ni. 

Everton hian Watford midfielder Abdoulaye Doucoure lalut turin inremna an nei tawh bawk a, Doucoure hi pound maktaduai 25 man niin Toffees-ah hian kum li khel turin contract a ziak ang. 

Hetihlai hian Napoli midfielder Allan chuan Everton hi a zawm dawn bawk a, kum 29 mi midfielder hi Brazil international a nih avangin a chhe lo tih a chiang.

Napoli chairman Aureolio de Laurentis chuan, "Tunah chuan a tawp nan mangṭha kan inti tawh a, Allan hi Everton-ah a kal dawn a ni," a ti. He thuziak i chhiar meuh chuan Everton nena indawr player pathumte hi Premier League club chuan official-in an tlangzarh tawh hial mai thei.