Barcelona in ropui takin Villarreal an lehthal
Pathianni zan La Liga inkhelah Barcelona-in an khelmual Camp Nou-ah Villarreal CF an lo mikhual a, si phur zawkah vawi hnih an ṭan hnuin 'comeback' ropui an lantir a, 3-2 a hnehna changin match 18 chhung inelna hrang hranga hneh loh tawng lo Villarreal kaltluang lai an tihtawp sak.
Inkhel an ṭan a, Bracelona-in bul an ṭan ṭha a, an chance neih hmasak berah Luis Suarez chuan a pet goal lo tlat. Beisei loh zawk Villarreal-in hma an hruai a, Barca hmelma kumhlun Real Madrid aṭanga loan-a an hawh Denis Cheryshev chuan minute 30 naah an hmahruaina goal a thun. Mahse, Villarreal-in hma an hruai rei lo a, Neymar chuan half-time dawnah an siphurh a rawn sut.
Second half an khel a, minute 50 naah beisei loh thil bawk a thleng leh ta! Gerard Pique tihsual zarah Luciano Vietto chuan Villarreal tan goal a khung ve leh a, Villarreal-in hma an hruai nawn leh. Mahse, an hlim authawm pawh a reh fel hmain Barca tan khel ṭha em em mai Rafinha Alcântara a lo lang a, Villarreal an nih rualna leh Barca goal hnihna ni bawk minute 53 naah a khung a, hei hi minute 55 naa Barca thiampuipa Lionel Messi goal-in a chhunzawm ve lehnghal!
Hun tawp thlengin goal a lut tawh lo a, a tira vawi hnih lai si phur zawka ṭang Barcelona-in Villarreal 3-2 in an hneh. Barca hi an chung chiaha awm an hmelma kumhlun Real Madrid aiin point khatin an hniam a, khelh khat in an khel hnem thung. Inrinnia Real Sociedad 4-1 a hnehtu Real hian La Liga-ah vawi 20 khel tawhin point 51 an nei mek a, an hnuai chiaha awm Barca hian vawi 21 khelhah point 50 an nei thung a ni.
Inkhel leh a behbawm
Barcelona tlar hma an hmuhnawm chhunzawm zel a, South American trio Luis Suarez, Lionel Messi leh Neymar-te dan tum hi defender tan hna hautak a tling. Neymar-a'n goal a khung a, second half-a Rafinha goal khung hi Suarez-a cross Messi a pet an lo khawih per aṭanga lut a ni a, a hnu lawkah Messi ngeiin goal a khung bawk. Vawi hnih lai si an phurh hnua 3-2 a an chak theihna tura hemite pathum khelh dan en chuan Barcelona hi dan an har tawlh tawlh dawn a nih hmel.
Messi ṭangkaizia kan hmu leh a, he inkhela a goal khung hi tun season La Liga match 21 a khelha goal 22 a khungna a ni leh der tawh! Neymar hi a khelh dan leh a kum (22) khaikhin 'a la ropui dawn' tih bak sawi tur a vang rih hle. Luis Suarez hian nikumah English Premier League-ah amah chauh deuhthawin Liverpool a champion pui ṭep a, goal 31 lai a khung.
World Cup-ah hmingchhe mah se Barca-in pound maktaduai 75 sengin an lalut. Liverpool a khelh lai angin Barca-ah hian goal khung pup pup lo mah se Barca player ṭangkai tak a ni.
Enrique thukhawchang
Inkhelh zawhah Barca Manager Luis Enrique a hlim a, "Vawi hnih lai si kan phurh hnua kan sut zo leh thei khan min tilawm a, kan khel ṭha tih kha khan a lantir a, team ṭha tak lakah hnehna kan chang a ni," a ti a, a naute khelh danah a lawm hle.
Tunhnaia Messi nen boruak nei anga an sawi Enrique chuan a tlar hma pathum fakin, "Tlar hma lama players ṭha tak tak neih hi chu a nuam a, an khelh ṭhat hian a nuam lehzual a ni," a ti.
Suarez chungchang a sawi belh zauh a, "Inkhel chhung zawng khan defender tan a hnawksak em em a, a khel ṭha hle a ni. Team tan a ṭangkai em em a, goal a khung har tawh lo ang, a la khung em em ang," a ti bawk.