African Cup Semifinal-ah Ivory Coast leh Ghana

Pathianni zan khan Africa Cup of Nations quarter final-ah Ivory Coast leh Ghana te'n an khingpui Algeria leh Guinea hnehin semifinal an lut.

Ivory Coast hian Congo hnehtu Congo DR an hmachhawn ang a, semifinal pakhat zawkah Ghana-in Tunisia hnehtu Equatorial Guinea an hmachhawn ang.

Ghana an kal zel

Semifinal lut turin Ghana-in harsatna an nei lo. Ghana hian a zawna vawi nga Africa Cup of Nations semifinal lut turin Guinea 3-0 in an sawp. Guinea hian ṭhumvawr hmangin quarter final an lut a, semi final lut tur erawhin an vanneihnain a daih bik lo.

Inkhelh ṭan aṭanga minute lina lekah Christian Atsu-a'n Ghana goal hmahruai a khung a, first half tawp hma hretin Kwesi Appiah-a'n goal hnihna a khung leh bawk.

Second half-ah Ghana an chungnung chhunzawm a, minute 61-naah Atsu-a'n goal hnihna a khung a. Goal dang luh belh loin Ghana 3-0 in an chak.

Ivory Coast tan Bony

Algeria-in World Cup 2014-ah Germany hneh loin an tlawm a, champion zui ta Germany nena an inkhelh ṭum khan khawvel hmaah an thiamzia an pho lang thei a ni.

Pathianni zanah erawh Algeria hian World Cup-a knockout stage thleng pha lo Ivory Coast lakah 3-1 in an tlawm.

Ivory Coast tan Manchester City player thar Wilfred Bony chuan minute 26-naah goal hmahruai a khung. Second half-ah Algeria-in Hilal Soudani hmangin minute 51-naah sut a, amaherawhchu Ivory Coast-in Bony hmangin minute 68-naah hma an hruai nawn a. Injury time-ah Roma forward Gervinho-a'n Ivory Coast chakna a nemnghet.

Ivory Coast coach Herve Renard chuan, "Inelnaa team ṭha ber kan hnehin ka hria. Algeria hneh tur khan mumal taka kan inrem a ngai a, counter attack hmanga kan nawr a ṭul a ni. Football-ah chuan player ṭhate nihna tak phochhuak turin tactic ṭha neih a ngai a, Bony leh Gervinho te khan an theihna tak tak an lantirin ka hria," tiin a sawi.