Boxing khawvel hmuh chak Mayweather vs Pacquiao a thleng dawn hnai

Thawm an neihna a rei tawh a, an incho tawn reng a, an inhnek dawn, dawn leh lo tih vel thuthang a awm deuh reng. Khawvelin Manny Pacquiao leh Floyd Mayweather Jr. te inhnek hi a hmuchak a ni.

Tunhnaiah hemite pahnih hian chanchin thar an nei leh a, Boxing promoter lar Bob Arum chuan inbiakna a kal mek thu leh ni reiloteah an inhnek hun tur tih chian a nih tur thu a puang ta rup mai.

Bob Arum chuan he thu hi New York Post hnenah sawiin, "Engkim a kal tluang a, lehkha a ziah fel ngaite kan ziak fel ang a, ni reiloteah engkim a chiang tawh ang," a ti a ni.

He inhnek a thlen leh thlen loh chungchanga buaina awmchhun chu Pacquiao contract neihna Time Warner/ HBO leh Mayweather contract neihna CBS/ Showtime te an inrem theih leh theih loh a nih deuh tawh mai hmel a, inrem tur chuan 'joint pay-per-view telecast' a an tih a ngai dawn a ni.

Pacquiao leh May­weather hi Miami Heat leh Milwaukee Bucks te'n Miami khawpuia NBA match an khelh ṭumin an inkawm a, inkhel an en zawh hnuin Mayweather hi Pacquiao thlenna Hotel-ah a leng a, darkar khat aia rei mah an titi a ni.

Ruahmanna anga thil a kal tluan chuan May ni 2 ah an inbeih rin a ni a, khawvel boxing history a sum tamna ber a ni bawk ang.