Old Trafford-ah Cambridge United an lut dawn

January 23, Zirtawpni zan khan Cambridge United-in an khelmual entu 8000 lek lenna Abbey Stadium-ah Manchester United an barakhaih a, goal awm loin an inhnehtawk. Zanin dar 1:15 hian mipui 75,731 lenna Old Trafford-ah replay khelh tur a ni a, Star Sports 4-ah LIVE a ni ang.

Manchester United hian kartawp khan Leicester City 3-1 in an hneh a, Pathianni zana Swansea City laka Southampton an tlawm bawk avangin United hi table-ah pathumnaah an inhlangkai.

Cambridge United erawhin kartawp khan Luton Town 3-2 in an hneh lo a, table-ah 14-naah an awm mek. United leh Cambridge inkarah hian club 78-an awm.

Zahna kawn

Manchester United-in mualpho nawn lo turin Cambridge United hneh ringawt a tawk lo, chiang taka an chak a ngai. Old Trafford-ah United tlar hmate'n goal a surtir theih chuan Louis van Gaal leh a hote'n 'zahna kawn' an pumpelh dawn tihna a ni.

United-in tlar hmaah Wayne Rooney an chhawr a rinawm a, Radamel Falcao leh Robin van Persie te erawh an chawlh tir a rinawm thung. Starting eleven chang tam lo James Wilson, Ander Herrera leh Paddy McNair te'n khelhna hmun an chang a rinawm a, keeper Victor Valdes pawh a vawi khatna atan first team tan a inlan thei bawk.

Cambridge United manager Richard Money-a'n an player neih aṭangin duh thlan tur a ngah ve hle.

Premier League-a Manchester United champion pui tawhtu Luke Chadwick-a'n bul a ṭan nghal a rinawm a, tlar hmaah Robbie Simpson a inlan rin a ni bawk. Tute pawh lut se United squad nena khaikhin chi an ni lo.

Ticket chungchang

Manchester United supporter zingah season ticket nei 9000 an awm. Heng supporter-te hian zanin inkhel hi an en a ngai a, an lei a ṭul bawk. United thuchhuakin a tarlan danin ticket lei duh lo chuan Sunderland nena an inkhelh hunah an season ticket an hmang thei dawn lo tih a ni.

Cambridge United lamin ticket 6,500 an chang a, ni thum chhungin an hralh zo vek.

Cambridge chairman Dave Dogget chuan, "Kan manager Richard Money, team leh staff zawng zawngte min thlenpui hi a ropui hlein ka hria. Tun dinhmunah hian he club chairman ka ni thei hi ka inchhuang hle a ni," tiin a sawi.

United an vannei

Old Trafford-ah United-in hnehna an chang a nih chuan zanina replay khel ve tur tho Preston North End leh Sheffield United te fifth round-ah an hmachhawn dawn. Preston leh Sheffield te hi League One club ve ve an ni a, United tan kawng awlsam tura ngaih a ni.

Zanin vek hian Premier League club Sunderland leh Fulham te'n replay an khel dawn a, Nilaini zanah Bolton Wanderers leh Liverpool te an inkhel ve leh bawk ang.