October 3-ah entu awm theih beisei

Arsenal chuan nimin khan thuchhuah siamin October 3-ah chuan Emirates Stadium-ah inkhel entu an awm theih tawh an beisei thu an sawi, season thar Premier League match hmasaah erawh a hmuna entu awm loin an khel ang.

Covid-19 vangin season hmasa kha an buai viau, June aṭang khan EPL khelh chhunzawm ni leh mah se stadium chhungah entu fans an awm thei lo. Britain sorkar chuan tun hnaiah inkaihhruaina a thlah dul leh hret tawh.

Kar hmasa khan Chelsea leh Brighton ten friendly match an khel a, a hmunah entu 2,500 an awm. Stadium khat tlata punkhawm chu a la rem dawn lo tih a chiang, chutihrualin eng emaw zat chu an luh theih beiseina a sang tawh viau.

Thuchhuah siamin Gunners chuan, "UK sorkar inkaihhruaina dan angin September 20-a West Ham nen kan khelmuala match kan khelh turah chuan a hmuna entu an awm dawn lo, chutihrualin Emirates Stadium-a ṭhutna tur bik siam chungin October 3-a Sheffield United kan mikhual hunah chuan entu an awm theih a beiseiawm," an ti.

Mikel Arteta enkawl Arsenal hian season hmasa khar nan FA Cup nomawi an chawi a, season thar khuhhawn nan Liverpool hnehin Community Shield an chawi leh tawh - an league match hmasa ber atan September 12 hian kai thar Fulham an lenchilh ang.