Arsenal laipui vawi nga a puak
Premier League-a Arsenal champion thei tawh loa ngaitu tan chuan ngaihtuahna sen ṭhat leh a ngai ang. Pathianni zan khan second half-ah game mawi tak khelin Aston Villa 5-0 in an sawp.
Emirates Stadium-ah minute riatna leka Olivier Giroud-a goal hmangin Arsenal-in hma an hruai a, second half-ah Mesut Ozil, Theo Walcott, Santi Cazorla leh Hector Bellerin te'n an khung leh bawk.
Tun season-ah a vawi khatna atan Arsenal-in goal nga an khung a, an hmelma Tottenham Hotspurs zuan khumin panganaah a awm. Gunners hian point 42 an hmu a, pathumnaa awm Southampton nen an point hmuh zat a inang.
Goal khat phawt
Arsenal-in inhliam vangin Alexis Sanchez an chhawr thei lo. German midfielder Ozil-a'n October thla hnua a vawikhatna atan starting eleven a chang thung.
Khup hliam vanga beisei pha lo Ozil-a ball fing tak chu Giroud-a tan duhthusam a ni a, French forward hian Villa goalkeeper Brad Guzan hmaah 'cool' takin a pet goal.
First half-ah Arsenal game a mawi tawk lo a, goal dang a khung belh thei tawh lo bawk.
Goal li dang
Second half-ah Arsenal-in game nalh zawk an rawn lantir a, minute 56-naah Giroud-a'n a goal thun tur siamsaktu Ozil chu a siam let a, German playmaker hian goal ban hrulah nalh takin a khung.
Kar hmasaa FA Cup-a Brighton lama goal khungtu Walcott a che ṭha chhunzawm zel. English forward hian minuute 63-naah nalh takin a hlai goal a, a pet goal ai hian goal khung tura a ball dan per a la nalh cheu.
Minute 75-naah substitute Chuba Akpom-a'n a tlan chak hmang ṭangkaiin Villa keeper Brad Guzan lakah penalty a hlawh chhuak. Midfield thununtu Carzorla a rawn pen chhuak a, pet ṭha lo mah se Guzan dan sual zarah a goal.
Minute 90-naah Bellerin-a'n Arsenal goal ngana a khung a, defender hian box pawn hret aṭangin a push goal - he goal hi a professional goal hmasa ber a ni. Striker tam takin Arsenal rawlthar goal khung hi an pet lut kher lo ang.
Arsenal keeper David Ospina-a'n hna a nei tam lo a; hnai tak aṭanga Andreas Weimann ball tauh leh box pawn aṭanga kawh taka Ashley Westwood pette chu Colombian keeper hian a dang ṭha hle.
Aston Villa-in an inkhel hnuhnung parukah goal an khung tawh lo a, table-ah 16-naah an awm a, manager Paul Lambert-a dinhum a derthawng tawh hle.
Arsenal erawh an player pawimawhte an dam kim ṭan a, field chhungah an theihna an lantir avangin manager Arsene Wenger-a sawiselna pawh a ri tawh meuh lo.
Engnge an sawi?
Arsenal manager Arsene Wenger chuan, "A lawmawm lai chu goal kan chhuah lo kha a ni. Goal kan khung thei tih kan hria a, min dan tum mah se chance insiam turin dawhtheihna kan nei a, chu chu goal kan khung theihna chhan a ni," tiin a sawi.
Arsenal boss chuan sawi chhunzawmin, "A hun takah ngai kan awh leh ṭanin ka hria, season tawp thlenga kan chet ṭhat chhunzawm a pawimawh dawn a ni. 4-0, 5-0 a hma kan hruai hnuah pawh tlar hnung kan la inrem phui ṭha a, a tir aṭangin goal venhim leh goal nawr kawngah kan khel ṭha a ni," tiin a khelh dana a lungawi thu a sawi.