Saints dinhmun a derthawng

Southampton-in season tharah Champions League khelh ngei an tum a, amaherawhchu Pathianni zana Swansea an hneh loh avangin an dinhmun a derthawng a; an elpui Manchester United leh Arsenal an chak avangin Saints din­hmun a derthawng lehzual.

St Mary's Stadium-a entu mipui 30,943 hmaah Liverpool player hlui Jonjo Shelvey chuan goal awmchhun a khung a, Swansea-in mual neitu Southampton 1-0 in an hneh.

Inkhel chu

FA Cup aṭanga an tlak avangin Ronald Koeman enkawl Southampton-in chak an mamawh a, inkhelh ṭantirh aṭangin chak an tum tih an lantir. Swansea boss Garry Monk-a'n hrem vangin Gylfi Sigurdsson a chhawr thei lo a, Saints aṭanga an lak Jack Cork pawhin transfer an tihfel tlai vangin a club hlui hi a hmachhawn thei lo bawk.

Inkhel ṭantirah Saints-in goal khung theih­na tur an nei nghal a, Nathan­iel Clyne-a cross chu contract pawtsei thar James Ward Prowse-a'n goal zawnah pet mah se keeper Lukasz Fabianski-a'n a dang ṭha hle.

Manchester United nena sawi zawm English right back Clyne hi minute 90 chhung a khel ṭha a, amaherawhchu a team-te a chakpui zo lo. Swansea pawhin first half-ah Bafetimbi Gomis hmangin goal chance an nei a, goal erawh second half-a lut a ni. Hun tawp hma minute sarihah yard 25 aṭanga Shelvey ball pet kawh tak chu Saints keeper Fraser Forster tan dan rual a ni lo. Hun tawp hma hretin defender Ryan Bertrand-a'n Swansea forward Modou Barrow a tlawh avangin hnawhchhuah a ni a, player 10-a khel tluan Saints an chak lo.

Swansea-in Shelvey goal hmangin kum 62 hnua a vawi khatna atan St Mary's Stadium-ah Southampton an hneh.

Eng nge an sawi?

Southampton coach Ronald Koeman chuan, "Ka ngaihdan chuan red card ni loin yellow card tur zawk a ni. Kan khel ṭha tawk lo a, team vannei zawk an chakah ka ngai," tiin a sawi.

Koeman chuan, "Kan elpui team dangte chuan squad chak leh khawng tak an nei a, chutichung chuan keini pawh hian Champions League khel turin theihna kan nei a ni," a ti.

Dutch manager hian transfer hun tawp hmain mithar an lakluh ngei a beisei thu a sawi tel bawk.

Swansea Boss Garry Monk chuan, "Jonjo khan khatianga goal khung tur khan theihna a nei a, player naupang tak ni chungin midang fuih phur a thiam em em a ni," tiin a sawi.