Mizoram-in West Bengal an hneh Penalty Area chhungah Indirect Freekick?

Nimin khan Kozhikode, Kerala-ah Mizoram chuan National Games-a an game hmasa berah 2011 champion West Bengal chu David Lalrinmuana leh Laldampuia te goal hmangin 2-0 in an hneh. Nilaini zing dar 7:00-ah Mizoram hian Punjab an hmachhawn leh ang.

Tunge khel?

Mizoram team-ah MPL2 best forward MS Dawngliana leh William Lalnunfela te an tel a, amaherawhchu forward pahnih hi inhiam vangin chhawr theih an ni lo.

Mizoram-in 4-5-1 formation an hmang a; keeper-ah Zothanmawia a awm a, tlar hnungah Lalrozama, Lalṭhakima, Lalramchhllova leh Thomas Lalengkima te an intlar bawk.

Midfield laiah R. Malsawmtluanga, David-a leh Lalbiakthanga te an awm a, wing-ah Albert Zohmingmawia leh Laldampuia te awmin tlar hmaah Zoramthara a mal tlat.

Inkhel chu

Mizoramin inkhel an thunun nghal a, minute 14-na lekah David-a'n goal mawi a khung. Aizawl FC captain David hian Kerala defender a sep khum hnuah keeper a pet khum nalh hle.

Hemi hnu hian David leh MS-a te'n wall pass hmangin Kerala defence an ṭhiat a, penalty area-ah MPL2 best player MS-a chu pet thluk ni mah se penalty aiah indirect freekick pek an ni.

Hun tawp thlengin Mizoramin inkhel an thunun a, amaherawhchu second half-a Dinthar FC forward Dampuia goal bak goal dang an khung belh lo.

Coach a lawm

Mizoram coach K. Malsawmkima chuan, "Kan beisei aiin ka naute an khel ṭha a, vannei ila chuan goal ruk khung thei kan ni. Kan match hmasa bera kan chak theih avangin ka lawm takzet a ni. Indirect freekick chungchanga referee thutlukna kha chu a mak ka ti khawp mai. Pathianin min awmpui anga Punjab kan hmachhawn hunah pawh kan chak theih ngei ka beisei," tiin a sawi.

Mizoram hi India rama record nei ṭha ber zinga mi pathum - Punjab, West Bengal leh Services te nen Group B-ah an awm khawm.