Juventus an chak bik lo

Inrinni zanah AS Roma leh Empoli an inhnehtawk a, Pathianni zanah goal awm loin hmahruaitu Juventus leh Udinese an inhnehtawk. Serie A-ah Juventus-in point 50 hmuin hmahruaitu an ni chhunzawm zel a, pahnihna Roma nen point sarihin an inthlau.

Inkhel dangah AC Milan-in hnehna an chang ve ta a, table mawngphaha awm Parma 3-1 in an hneh.

Filippo Inzaghi enkawl Milan tan Jeremy Menez-a'n goal hnih a khung bakah Cristian Zaccardo te'n goal an khung a, Parma tan Antonio Nocerino-a'n a club hlui lamah a khung ve hram. Point thum hlawhchhuak mah se Milan manager Inzaghi chuan inkhelh banah player-te an la inrintawk loh thu a sawi.

Inter Milan hi Roberto Mancini enkawlna hnuaiah an che fuh thei lo. Pathianni zan khan season chawhma lama 7-0 a an sawp Sassuolo lakah 3-1 in an tlawm. Sassuolo tan first half-ah Simone Zaza leh Nicola Sansone te'n goal an khung a. Minute 83-naah Mauro Icardi hmangin Inter-in goal khung mah se injury time-a Domenico Berardi penalty hmangin Sassuolo 3-1 in an chak.

Inter manager Roberto Mancini chuan, "Tihsual kan ngah lutuk vangin kan chak lo. Kan chet fuh loh a kaltluang a, insiamṭhat kan mamawh a ni," tiin a sawi.